秋生怕血腥？ 見人腦蛋糕即縮
向來天不怕地不怕的影帝黃秋生，連驚慄片也一而再接拍，沒想到卻對一個血淋淋的人腦狀蛋糕扁晒嘴，急急後退唔敢睇，令人意外！而衛詩雅自爆是韓國男神孔劉鐵粉，獲悉對方有意搭港鐵偶遇周潤發，即忽發奇想，望以同類方法攔截偶像！
黃秋生、衛詩雅、麥子樂等前晚出席英皇電影《失眠》首映，獲一眾英皇藝人撐場，包括鍾舒漫、鍾舒祺、湯怡、麥子樂、羅力威等，場面熱鬧。期間大會安排一個血淋淋的人腦狀蛋糕，幾位主角分別拿起手術刀及菜刀預祝票房大賣。惟到切餅時，秋生卻退後謂：「我拍戲唔驚呢啲嘢，但好怕啲食物搞到咁。」結果交由女將詩雅代理。
事後秋生手拿棒球受訪，笑指全為配合其棒球帽造型，令大家感覺他後生一點。對於剛才表示若該片票房好，不介意再拍第二部，問到是否肯再拍驚慄片？他笑謂：「我話拍其他戲啫，唔怕呢啲嘢啦。（票房目標？）唔知，是但啦！幾多咪幾多，隨緣。（成績好會心郁想再拍？）唔會，又冇錢分。」秋生更指現時忙於籌備8月底舉行的舞台劇，由於劇中要搞笑，令他大感壓力：「呢排都搞到謝晒，對白好難，應該排戲時都減到磅。」
對於「格鬥狂人」徐曉冬宣布取消與武林高手對戰，秋生聞言謂：「瀨嘢囉！呢啲叫年少輕狂，如果我係大師傅點解咁打？人哋都會覺得係出嚟抽水，武術係有哲理，提升人嘅修為一樣好重要嘅嘢。」
衛詩雅搭港鐵撞孔劉
而獲雙親到場支持的詩雅，對於近日為雜誌拍性感照，表示沒想過母親接受程度比她高，更指若日後遇到信任的導演及劇本，可以考慮性感上陣。談到韓國男神孔劉來港宣傳，她即表現興奮謂：「我有(目及)實即時新聞了解佢行蹤，知佢想搭港鐵撞發哥（周潤發），所以諗定搭港鐵撞孔劉，平時我搭火車，但為佢就由九龍塘開始搭港鐵沿線截！」
陳佩思掩飾人為失誤
至於早前為電影《常在你左右》拍攝服藥自殺戲時，因人為失誤不慎誤服藥物，及後被送到深切治療部（ICU）治理的陳佩思，講述事發經過時吞吞吐吐：「都過咗一段時間啦！我係有入到ICU。（你話件事係人為！）係，人為都有好多唔同，唔係有人特登傷害我，好感恩可以繼續拍戲。」並透露當日經醫生診斷後，指她對某些藥物敏感，但基於涉及私隱，故不想多談。
文：影視組