眼前一黑靠張繼聰扶住 歐陽震華外景暴曬中暑暈低
昨日開工的歐陽震華（Bobby）因炎熱高溫致中暑暈倒，幸張繼聰和邵美琪及時扶住才不致倒地，情況非常牙煙！在醫療室甦醒的Bobby隨後返家休息，對於身體情況令人關注，敬業樂業的他說：「頂硬上啦！」而他晚上亦重返電視城拍廠景，並指已無大礙，但不敢通知老婆：「費事嚇親佢！」
無綫福將歐陽震華昨午在將軍澳電視廣播城為無綫重頭劇《誇世代》拍攝外景時，因在烈日下暴曬致中暑暈倒，幸身旁的張繼聰和邵美琪及時扶住突休克的他，才不致仆在地上，否則後果不堪設想！台前幕後立即送Bobby往電視城內的醫療室急救，經散熱及飲水後，他開始恢復知覺，待情況穩定才返家休息，至夜晚再重返電視城為《誇》劇拍廠景。
抬往醫療室
Bobby接受本報電話訪問憶述中暑經過：「中午最曬嘅時候，成30度咁熱，我哋因為連戲，要着住冷衫同毛布恤衫拍外景，暴曬下又散唔到熱，所以眼前一黑暈低，好彩當時身旁有張繼聰、邵美琪扶住我，即刻抬我去醫療室，好近咋，就喺外景場地隔籬！」Bobby今次中暑，其身體狀況惹起關注，但專業的他說：「仲要連戲，頂硬上啦！我都想同觀眾講，唔好再批評啲演員拍古裝戲乜乜唔好，今次我連時裝戲都中暑，何況拍古裝要黐頭套仲慘，要體諒藝人嘅辛酸！（唔使入醫院檢查？）我都知道中暑可大可小，其實我喺醫療室休息後都冇乜嘢，唔使入醫院，中間我有一場戲都取消咗，依家返屋企抖吓，今晚可以再開工！」
至晚上七時，Bobby再返回電視城，記者見他神色尚可，他說：「冇咩大礙，我拍戲中暑都經常有，返咗屋企沖咗個靚涼，過個冷河好好多。（有冇瞓陣休息？）冇特別休息呀，要睇劇本呀，唔使做咩！」他將今次中暑歸咎於天氣太熱，自己又在冷氣房一出一入，身體不適應所致：「暈嗰時感覺到全身毛孔擴張，突然覺得好凍，行唔到兩步就暈咗。（老婆擔心？）冇同老婆講呀，唔特登講啦，費事嚇親佢。」之後着住乾濕褸兼拎住篋的他繼續開工。
面青口唇白
及時扶住Bobby的張繼聰接受電話訪問，指當時見到對方面青口唇白而嚇親：「嘩，咁快收到風？係呀，天氣好熱，啲戲服就係冬季，所以Bobby哥就喺呢個大熱天時中暑，我哋都擔心，見到佢嘴唇白晒，所以都休息咗一陣，個幾鐘左右，之後再拍番餘下嗰啲。大家睇到幕前一秒鐘，其實演員同工作人員都付出好多，好似今次咁，個個都喺度暴曬。」
文：影視組