陳嘉桓湊細佬 盡顯母愛
打得又湊得的陳嘉桓（Rose）昨日被發現與相差22年的同母異父細佬Jaxton一齊參加慶典。昨日除了是佛誕假期外，亦是農曆四月初八譚公誕，每年此日筲箕灣譚公廟均舉行舞龍舞獅巡遊表演，吸引大量善信參加。準備入場時，Rose對細佬無微不至，不但教坐在特製舞龍BB鼓車的細佬打鼓，睇到細佬玩到攰更抱起他休息。
作為滿分家姐當然不止於此，Rose見氣溫高達三十度，主動餵細佬飲水，以防對方玩得太High而中暑。不過盛會有幾百人場面熱鬧，貪玩的Jaxton不放過機會嚷住要繼續玩，任勞任怨的Rose二話不說讓細佬騎上膊頭，以勞力換對方開心，最終令細佬笑逐顏開。
放假幫手湊
Rose事後接受電話訪問時，坦言每逢放假都幫手湊細佬：「依家個個都覺得我細佬好搞笑，有啲朋友未見過細B嘅真身，但一直都有睇我甫上網嘅相，都話好似好熟悉細B咁。」她又讚細佬好聽話：「有咩事都會搵姐姐，一攰就叫姐姐抱，所以我會盡我能力幫手湊佢。」
