衛詩雅走火入魔 想減剩80磅

英皇電影《失眠》前晚舉行優先場，女主角衛詩雅悉心打扮亮相，前來捧場的嘉賓有方力申、曾國祥、王敏奕、顏子菲、許靖韻、談善言等。衛詩雅現時102磅，身形纖瘦標準，向來拍戲搏到盡的她透露，為了另一部新戲的角色要減至80多磅，即要減20磅：「靠做運動同營養師幫助減磅，其實營養師話依家嘅磅數已經唔可以再減落去，但係都冇辦法。（驚唔驚減到冇咗身材？）我本身都冇，所以唔會好介意，如果有就會唔捨得。」

行性感唔係等錢使

最近衛詩雅一輯性感相引起網民關注，她都覺得該輯相好性感：「當初都擔心屋企人未必接受，但媽咪睇完話好靚，仲提議攞去放大，令我好意外。」惟她不敢再影更性感的相片，認為見好就收：「不過都有啲唔開心，有人留言問我係咪等錢使，我影呢輯相唔係為錢，自己想試多啲唔同嘢啫！（電影有性感演出？）有啲性感得嚟高檔，有啲就低俗，要睇導演、劇本。」

談善言向黃秋生偷師學演技。	方力申覺得在內地拍戲較易有突破。	王敏奕、曾國祥拍拖睇戲。

方力申寫劇本搵老細

方力申被問到可有興趣拍驚慄片？他表示不介意：「其實我喺內地有拍過，精神分裂、甚至強姦嘅角色都拍過，香港係少啲呢類角色，如果要突破就要做平時見唔到嗰一面，內地機會係會多啲。」現時自由身的他正籌備警匪片劇本，打算找投資方開戲，角色選擇可以更自主。而談善言最近忙拍新片，片中要肢解殺人，她笑說：「之前拍殺人拍咗十個鐘，事前都有上網睇片學嘢，以前都睇過黃秋生嘅《八仙飯店之人肉叉燒包》。」

文：影視組