孫耀威陳美詩美國註咗冊!

44歲的孫耀威(Eric)與36歲的陳美詩(Macy)拍拖八年,一直傳好事近,昨日Eric加盟新唱片公司,席間突然宣布早前已與Macy秘密在洛杉磯註冊結婚,又自爆當日緊張到連戒指都忘記帶!他透露三年前在瑞士求婚,據知他送上價值百萬的三卡鑽戒,求婚當日Macy更感動爆喊!他亦有意今年在港行禮及擺酒,自認「仲OK」的他希望生幾個BB!

歌手孫耀威與女友陳美詩早前被影到在澳洲及香港影婚紗相,二人卻一直口密避談婚事。昨日Eric出席加盟新唱片公司星娛樂的記者會,播放親自創作的新歌《It's My Day》MV後,他在台上報喜,突然自爆已與Macy在美國洛杉磯秘密註冊結婚:「我哋係基督徒,希望遲啲返嚟香港教堂做儀式先叫禮成,呢首歌送畀老婆,一直對我不離不棄,喺我低谷時扶我一把、帶領我,希望得到大家祝福!」大會送上結婚蛋糕,當Eric揭開蛋糕上的頭紗裝飾後就出現Macy照片,抵死的他笑說:「好彩唔係紙紮啫!」隨即作狀錫向老婆照片。

緊張到漏帶婚戒註冊

受訪時Eric不肯透露註冊的確實時間,只謂不是今年的事,並笑言註冊當日因太緊張,連婚戒都忘記帶去:「嗰吓全程耷低頭,搞到血糖過低差啲暈,又緊張到唔敢周圍望。」說到求婚過程,他表示三年前在瑞士向Macy求婚:「幾年前有段時間好低落,覺得出道至依家都四處漂泊,莫講話女友,識朋友都難,好似一隻冇腳嘅雀仔,喺幾年前一個好唔開心嘅夜晚,好想有條根落腳,於是決定去瑞士扮旅行,搵咗間Macy好鍾意嘅甜品舖,包起間舖喺嗰度向佢求婚。」據知誠意十足的他當時向Macy送上價值七位數字的三卡求婚鑽戒,令Macy感動爆喊!

講到選於現時公布婚訊,Eric表示求婚後一直未有時間完成婚事,但現在希望在上帝面前舉行婚禮,故希望今年內在教堂行禮及於晚上擺酒。他說:「過去呢幾年多得老婆幫手,之前生意唔好,前年自己又受傷,流好多血,仲休克差啲死,喺醫院多得佢唔瞓覺陪住我,呢個人喺我生命唔單止享受開心日子,喺我唔得時都好真實地支持我。」他亦謂求婚後有一次到美國工作,故順道影了「哎吔」結婚相,但上次到澳洲才是正式拍攝:「Macy係着婚紗,我都好期待睇到,大家都靚靚。」

「質量仲OK」恨生多啲

問到下一步可會有「造人」大計?Eric笑說:「都想,做過檢查,我都仲OK,Macy都OK,本身都驚自己忙會影響到質量,但檢查過係唔錯嘅,但唔會點Plan,有就有,依家全世畀都知我有個老婆,希望做好老公本分,慢慢有下一代,希望可以生多啲。」至於新娘Macy昨日透過電話多謝大家祝福,提到註冊當日的情況,她笑言心情緊張但開心,說到Eric忘記帶戒指:「不過都好浪漫、好開心,係我哋人生一個好有紀念性嘅日子!我都係覺得好笑,但完全唔會嬲佢,覺得佢好傻豬咁囉!」

文:音樂組 

攝:吳文聰