吳若希誕6.3磅女 痛22粒鐘冇力喊

榮升人母的24歲吳若希(Jinny),昨晨為澳門闊少男友Alex誕下千金Giselle,B女重6.3磅,Jinny因為陣痛22小時,見到女兒第一眼都冇氣力喊。她笑言囡囡一出世就識得搵奶奶飲,又踢爆Alex為了型,幫女兒剪臍帶一刻強忍淚水,谷到雙眼通紅。

Jinny的寶貝女Giselle昨晨出世了!據知Giselle的預產期是本月20日,選擇順產的Jinny前日下午才作動,Alex急忙送她入院,經過22小時陣痛,女兒正式出世,由Alex親手剪臍帶,Giselle重6.3磅,樣似爸爸。生B後的Jinny攰得如昏迷般,至昨晚她接受無綫「娛樂新聞台」電話訪問,倦透地指Alex有陪她入產房,更爆Alex為女兒剪臍帶一刻,雙眼谷到通紅:「佢話唔可以喊,要型!好彩佢唔怕血,好英勇咁剪臍帶。」

下巴兜兜似媽媽

同樣冇喊的Jinny表示見到女兒第一眼就開心到笑:「冇力喊,醫生話我好叻,push咗三、四下好快出嚟。」整個生產過程只用了十分鐘左右。她指女兒的眼、鼻及面形,甚至手腳都似足爸爸,唯一是下巴兜兜跟嘴仔似她:「佢幾乖,因為聽好多人話初生BB成日喊,佢都有喊,但喊兩下會靜落嚟,眼仔睩睩,佢一出世就識得搵奶奶飲,所以我冇咩嘢需要擔心。」Jinny坦言今次生B是難忘經歷,想到當年母親生自己出來那種痛楚,終體會到母親的偉大。昨晚9時,Jinny將女兒的腳印放上社交網,又以乖豬來形容女兒。

星夢老闆何哲圖昨晨8點已收到Jinny女兒的照片,他說:「Jinny身體唔係幾好,叫咗佢安心坐月,養好身體。」今年復工與否仍未知。好友許廷鏗已第一時間聯絡Jinny恭賀,不過知她好攰,需要時間休息,又取笑Jinny未生前已經有媽媽格,深信她會是個好媽媽。另一好友吳業坤亦戥Jinny開心說:「希望BB似Jinny咁靚女,可能封利是仔畀佢。」跟Jinny情同姊妹的Kellyjackie前日有份陪她入院,睇住B女出世:「我係24小時服務專線,有咩就打畀我。」胡鴻鈞則搞笑說:「佢佗B嗰陣最開心同自豪係個胸,希望佢生完都keep到。」

林盛斌對定親家

剛宣布太太佗住「慈姑椗」的林盛斌說:「梗係戥佢開心。(你個仔將來追佢個女?)將來溝唔溝佢個女就睇將來點先啦!我個仔太多女要溝啦,講笑啫,如果做埋親家梗係冇得頂啦!(佢個女大過你個仔?)又唔係忘年戀,差幾個月啫,人哋差一大截都係咁啦!」

文:音樂組