嘉穎撐陳凱琳演嘢 點能夠一步登天？
由歌手變身演員的鄭嘉穎，在無綫浸淫了十餘個年頭，如今終於決定離巢接受人生新桃戰。嘉穎公開感激無綫當年在逆境中扶了自己一把，冷暖絕對在心頭。近年性格變得樂觀的他，大讚舊愛佘詩曼演技之餘，再次開腔反擊網民對女友陳凱琳的惡評，且不惜自爆：「我都試過喺片場畀人『問候』。點會一步登天？唔應該太過苛刻！」
嘉穎明白女友的處境及困擾，某程度上可能是基於感同身受。當年以歌手身份入行的嘉穎，曾被經理人公司「安排」去拍劇演戲，結果於片場遇上不快事，情景至今仍歷歷在目：「當時真係唔知自己做緊乜，走位又疊晒光咁。人哋畀錢你嚟開工，分分鐘計緊數，唔係出錢嚟教你嘢，呢點我好明白。做唔到人哋嘅要求，咪畀人出聲『問候』祖宗十八代囉！幾難聽嘅說話都聽過，難受就一定啦！不過由嗰刻開始我就話畀自己聽，一定唔可以重複犯錯！」
可能早就「冇得撈」
90年代初入行、曾經失意「出走」台灣、到2000年無綫向他招手，嘉穎形容這段日子是自己最灰暗的人生。提到當年無綫的提攜，嘉穎坦言倘若沒有這個機遇的話，自己或許早已「冇得撈」﹕「其實當初返嚟簽TVB，生活支出方面都仲要媽媽補貼，不過多謝無綫肯畀機會我，而我當時要嘅只係穩定生活啫！TVB有樣嘢好好，有培育演員嘅空間，只要你肯做、有演員道德、唔遲到早退，機會陸續有來。可能當初我對戲劇嘅理解係零，但我會試唔同嘅演繹方法，呢種唔得下次就換第二種囉，呢種『實戰式』嘅方法去培訓演員，真係好有用。」
離巢搵新嘗試
問到為何此時此刻離巢？他坦言：「如果依家唔走，我諗以後都未必會走喇！我喺度諗自己仲有啲乜嘢新嘗試呢，好彩嘅係去年中我開始有呢個打算嘅時候，同時間竟然有人主動Approach我，問我有冇興趣試吓演歌舞劇，呢個挑戰好有新鮮感，梗係好啦！根本冇理由Say No添呀！」訪問期間提到「轉向影圈發展」時，嘉穎實話實說：「呢個係好明顯嘅打算啦！（唱番歌呢？）唔會，我好清楚唱歌係興趣，但依家好難搵到食嘛！」
人生聚有時、散有時，服務無綫16載的小生鄭嘉穎離巢外闖前，堅持夥拍田蕊妮作「最後一擊」，演出恩師王心慰監製劇集《迷》，事實證明這次「雙劍合璧」效果不錯，劇集播放到尾段更掀起全城熱話！今次合作獲阿田大讚體貼，直呼他為「暖男」，嘉穎「回敬」對方說：「能夠同佢合作拍最後一部劇，可以講係圓咗我嘅心願，感覺好圓滿。佢嘅角色顛覆好大，大家有目共睹，但由始至終我冇擔心過佢嘅能力，深信佢一定Handle到，坦白講佢表現比劇本更見出色！」
阿佘學嘢快
多年來遇過的女拍檔中，要數演技，除了阿田，嘉穎最難忘是佘詩曼。他說：「佢好聰明，學嘢好快，好記得當年同佢拍《宮心計》，劇本在手都有啲飛紙仔嘅情況出現，佢啲對白又長加上文言文，仲要演埋戲添，但交到佢手就一定處理得到。」提起阿佘，嘉穎語氣沒有半分猶豫，反添幾分由衷的欣賞，「再見亦是朋友」相信莫過於此！
女友好聰明
對於女友陳凱琳（Grace）的演技屢受抨擊，嘉穎不是沒有心痛，談起這個問題他更Man爆維護對方：「其實佢好勤力同聰明，但所有嘢都需要琢磨，點能夠一步登天呢？我覺得Grace需要時間同機會浸淫。To Be Fair，好多演員都要多年後先知自己做緊乜，但依家嘅觀眾同以前嘅好唔同，所有嘢要求『即食』，覺得電視台捧你，你就要即刻得。我覺得網民有時太苛刻兼不切實際，所以我同佢講，要隔絕外來嘅噪音，專心做自己嘅嘢就得喇！」
後記：感情事業兩得意 變得開朗
認識鄭嘉穎超過20個年頭，一直覺得他是個不喜歡在人前表現真我、寡言及行事小心的人，直至近期坊間不斷有人說：「鄭嘉穎開朗咗好多。」抱着半信半疑的態度去開始這個訪問，眼前的嘉穎果然相當好傾，訪問結尾時他主動補上一句：「其實仲有嘢可以同你講，夠喇？不過留番下次先啦！」好奇地問他為何有如此改變，他笑說：「人生閱歷多咗，待人處事一定會唔同啦，咁感情、事業穩定都有關係嘅。」如是說……祝福嘉穎繼續「開朗」下去。
文：影視組
攝：司徒國榮
服裝：TOM FORD
髮型及化妝：亨利