謝賢搞笑向婷婷催婚 咁老仲唔嫁
藝人謝婷婷與荷里活影星「鷹眼」謝洛美維拿拍拖，前晚她與父親謝賢出席活動，謝賢竟不知「鷹眼」是誰，但就催促現年34歲的婷婷結婚：「咁老仲唔嫁做乜！」令婷婷哭笑不得。
謝婷婷前晚出席品牌活動，剛巧父親謝賢路過附近，順道入場跟女兒合照，問到謝賢會否想婷婷早日結婚，向來風趣的他笑說：「叫佢快啲結婚啦！咁老仲唔嫁做乜！」至於有否見過婷婷男友謝洛美維拿（Jeremy Renner）？他竟反問﹕「邊個嚟？」婷婷即指父親並不認識對方。她續透露下周將到上海一個月拍攝電影《歐洲攻略》，至於謝洛美屆時會否探班，她即爆對方亦身在亞洲工作，問到見面是否相當方便，她笑說：「亞洲都好大嘅。（有冇帶佢畀媽咪見？）未。（大家係咩關係？）了解中。（畀佢幾多分？）高分，但冇一名詞、冇數字。諗緊自己一個定拍拖，之前喺洛杉磯做咗鍾意做嘅嘢，好有滿足感，如果我做女朋友會好投入。（佢等你？）我想，如果佢OK。（問佢？）唔會問啦！」
祖兒Kathy「開側門」通風
同場出席的還有名模周汶錡（Kathy）、樂基兒、天后容祖兒及溥儀眼鏡行政總裁邱子傑夫婦等。產後首次出席公開活動的Kathy與祖兒同樣以側門大開的上衣露Bra示人。火速收身的Kathy說：「食吓菜、肉同飯咁，暫時唔做得運動減肥。（同產前差幾多磅？）幾磅，BB出世就瘦番。（再生？）大約一年後先再諗。（追女？）老公家族多男仔，生咩都冇所謂。」
而祖兒對於郭富城低調結婚惹負評，她認為結婚是兩個人的事：「兩個人開心最緊要，好戥佢高興。」問她會否一樣低調結婚？她說：「低有低好，高有高唔錯，但都一定有人講，唔會滿足到全世界。（你會低定高？）嗰刻想點就點，講完到時唔係又畀人話。」至於有否時間表，她笑說：「希望40歲前結婚。」
文：名人組