羅孝勇被車撞飛4米 腰椎骨折

羅孝勇（Sheldon）前日下午在旺角染布房街過馬路時，遭一輛疑衝燈的私家車撞倒，被送入廣華醫院，昨午約4時再轉送法國醫院治理。Sheldon在家人陪同下乘坐黑色私家車到達法國醫院，戴眼鏡及口罩的他落車時動作緩慢，明顯非常吃力而且表情痛苦。他坐輪椅上房安頓後，再由母親推着他折返醫院門外受訪。

站起似舉200磅

Sheldon講述事發時與女朋友王丹妮等過馬路，因當時開始下雨，他聲稱在行人燈轉綠色後即跑過馬路，卻被撞飛3、4米：「唔知點樣又撞到個頭，我就瞓咗喺地，好Dramatic！第一個感覺係背脊好痛，我好驚行唔到，唔知點算，去到醫院，淨係講到『唔該』同『好痛』。」講到傷勢，他表示照過腦掃描及X光後，醫生指其腰椎位置骨折：「依家企起身好似舉緊200磅重嘢咁，同埋手有啲擦傷，應該抖一個月就可以回復正常，好彩個腦冇事，冇其他位置骨折，係奇迹！」

問到傷勢會否影響工作計劃？Sheldon說：「本身5、6月去北京學普通話，7月返香港拍槍擊動作片，都有啲擔心，物理治療師話我之前運動量多，有機會搞得掂，都仲有2個月時間，希望做到。」

Sheldon落車時動作緩慢，非常痛苦。

坐輪椅的羅孝勇，在母親陪同下向記者講述事發經過。

媽咪急撲返港

他表示身在澳洲的母親得知他受傷後，擔心得漏夜飛返港陪伴。問到女友可有大礙？他指女友亦有擦傷，並指因公立醫院設有探病時間，女友前晚未能在醫院陪他：「我都叫佢返去抖吓，因為佢今日仲要做嘢，但有同佢傾過，大家尋晚都瞓唔到，係咁Loop住件事。」問到經此事後，可會更珍惜身邊人，早日與女友結婚？他說：「未諗呢樣嘢，但我一路都好珍惜身邊人，我好肯定。我唔會再相信紅綠燈，睇清楚先過馬路。」至於可會向司機追討賠償？他表示上救護車時有落口供，但尚未跟進事件。據警察公共關係科表示，事件現時被列作交通意外傷人案。

文：音樂組