張繼聰大讚福氣滿瀉
身為三女之父的林盛斌（Bob）昨日宣布追仔成功，好友張繼聰的細女Karina亦剛好滿月，阿聰在社交網上載一家四口的溫馨照並留言：「Karina滿月啦，要繼續快高長大，好似哥哥咁盞鬼，Daddy錫晒你哋，感謝太太，辛苦了，Love u all。」對此老婆謝安琪透過電話回應，指一家人低調在家食飯慶祝B女滿月，又透露自己餵奶很攰，每次餵完都會沉沉大睡。
至於Bob再度有喜，阿聰透過電話送祝福：「Bob係好認真嘅表演者！私下係個好爸爸同好老公，好佩服同鍾意佢，對工作好有熱誠，對屋企好有擔帶，真係一個好偉大嘅男人，好戥佢開心，有小朋友係福氣，佢係非常之有福氣！（佢終於恨到個仔？）好人有福報，心想事成！」希望Bob嫂可以開心享受懷孕過程，B仔出世定必健健康康。