最近為電腦動畫《藍精靈：迷失的村莊》（Smurfs : The Lost Village）聲演女藍精靈美芝的24歲美國女歌手Demi Lovato，一度沉淪毒海，不過5年來她藉着信仰與親友支持，成功重生。
童星出身的Demi與很多早入娛樂圈的藝人一樣，抵受不住壓力與引誘，一度濫毒。Demi接受訪問時憶述沉淪過去：「我直頭唔可以忍30分鐘唔食可卡因，我仲會帶毒品上飛機。我會偷運上去，然後等所有頭等機艙嘅人瞓晒，入廁所即刻『隊』。」除吸毒外，Demi亦酗酒，自爆一次令她醒覺的經歷：「我去緊機場，而我汽水樽入面入晒伏特加，當時只係早上9點，我喺車上面係咁嘔，而嗰次我只係搭飛機返洛杉磯返屋企。好多人可以幫到我，但我唔想佢哋幫。當去到嗰一刻，我就覺得當只係得番你一個人嗰陣已經唔好玩。」
Demi於2010年突然中止巡迴表演，進入戒療所就醫。經過長期努力，Demi終可重獲新生，今年3月是她「清醒」5周年：「我好感恩！經歷過高高低低。好多次我想再吸番毒，但我坐住自己隻手，求上帝解決我嘅癮。我好為自己驕傲，但冇咗上主、屋企人、朋友同所有支持我嘅人，我唔會做到。」Demi透露吸毒與酗酒的原因，是想逃避其躁鬱症與飲食失調問題。
現在的Demi感到健康與快樂，她以前靠別人、毒品或行為來填補心靈的空虛，現在則以照顧自己來填補這份空虛：「保持清醒好難！我去過戒療，出番嚟結果又吸過。我有時仲會面對問題，依家有時比較難，有時比較易，但我會集中目前所做嘅事，就係幫番有需要嘅人。」她曾接受一個朋友的母親所託，與志願組織成員坐11小時飛機，找朋友幫助對方戒毒。她希望大眾可以更關心吸毒者的精神健康問題。
Demi與男星威馬（Wilmer Valderrama）拍拖6年，男方陪伴她走過戒療的日子，可惜兩人去年仍是分手收場。威馬的支持，反而成為兩人關係終結原因。Demi表示：「我諗如果可以同一個新嘅人重新出發會比較健康。我同佢一齊時，我嘅病情總係關係嘅一部分，我成日都有問題，我需要放棄呢樣嘢。同一個見過你一切嘅人分開係好困難，不過重新同另一個人發展可能係好，因為以前嗰個我，已經唔係依家嘅我。」
文：外娛組