林奕匡冧掂未婚妻 搞婚禮冇嗌交
唱作人林奕匡（Phil）跟拍拖近十年的未婚妻李靄璣（Rikko）將於8月底在加拿大拉埋天窗，並於暑假期間影婚紗相，原本兩人想趁十周年紀念日結婚，但因場地問題而未能如願。問到Rikko婚禮是否準備得如火如荼？雖然因Phil工作繁忙而未能抽身處理，但她冧爆指Phil求婚時非常有誠意，所以今次就由自己主力負責。
藝人林奕匡的未婚妻李靄璣（Rikko）、黃芷晴、Yuki Lovey、少爺占及Supper Moment前晚出席Swatch SKIN手錶活動，穿上露肩碎花短裙的Rikko，大騷美腿及香肩，非常養眼！問到婚禮籌備進度？Rikko透露將於8月底在加拿大溫哥華舉行，而兩人今年即將踏入第十年，本想婚禮跟周年紀念同一天進行，可惜因場地問題未能如願。問到心情如何？她笑言：「原本都唔緊張，但仲有幾個月就到，突然就開始覺得好緊張。（會以咩形式舉行？）下午喺戶外行禮，之後大家一齊食個lunch，都會有兄弟姊妹喺香港過去，好想照顧好朋友，盡地主之誼帶佢哋周圍玩。」
黃芷晴戒酒減磅
提到Phil工作繁忙，是否已將婚禮全盤交給她打點？Rikko直言Phil求婚好有誠意，故自己負責籌備亦沒問題。問到籌備過程中可曾嗌交？她指大家都很隨和，而兩人婚後會定居香港，並於明年初在港補擺酒。
同場的黃芷晴被問到為何瘦了幾個圈，她自言不是刻意減肥，只因去年拍拖後跟男友的日常生活時間比以前穩定，加上戒酒，故瘦了15磅。問跟男友有甚麼共同嗜好？芷晴直言男友好遷就自己，更自爆想跟男友去大阪過生日。提到父母對男友的評價，她笑言只會默默觀察：「我諗都合格嘅，不過有時會為小事鬧交，依家拍拖十個月，磨合吓會再好啲。」
準人夫負責配合
另外，Phil與師妹黃浩琳昨日現身電台，林奕匡表示婚禮場地已經安頓好，只差交訂金，更會於6、7月拍攝婚紗照，他Sweet爆說：「佢（未婚妻）揀婚紗我去配合。」對於兩位師兄陳柏宇及林奕匡將榮升人夫，單身的黃浩琳承認被家人催拍拖，但她覺得感情事急不來。
文：音樂組
攝：劉斌