莊思敏恨拍拖等住畀人藐
藝人莊思敏與名媛陳君宜昨日現身中環，為有份投資經營的點心店試菜，品嘗加入emoji圖案的菜式，莊思敏認為emoji可以代替說話：「遇到有啲答案唔想答，有時又唔想畀人誤會，想答得可愛啲，公仔就好好用。我成日都用藐嘴同反白眼對個妹（莊思明），見到佢又同男友放閃，我就藐佢！（想唔想拍拖，等阿妹藐番你？）我都想快啲拍拖，依家冇乜人約，又唔想收兵嘥人時間，緣分可遇不可求。」隨即問身邊的陳君宜是否有好介紹，對方卻呆在當場，認真搞笑！
陳君宜認為男士現時對追女仔表現懶惰，莊思敏即附和：「咪係！約你幾次唔得，就會問：『你係咪唔想出嚟，有啲嬲，着着哋咁。』」她又笑言現時拍攝《溏心風暴3》及客串《誇世代》，工作時間穩定，有時間食飯，開到口等人追！至於陳君宜透露首間加盟店將於佛山開幕，香港亦計劃開第3間分店，雖然生意不錯，但由於市道一般，將減價走大眾化路線。