苟芸慧脫「胎」換骨16:9大翻身！

Mark埋筍盤「破處」

當年嘅苟芸慧真係陰功豬喇！因為一個「肥」字，好似跌咗落十八層地獄咁，肥到瞓咗喺度，用咗幾年時間先爬番上嚟，呢個人生超低潮真係唔易捱過嘅！高峰期重到180磅，雖然佢自稱冇咁重嘅，但170磅就一定走唔甩！架車無啦啦多咗幾條車胎，咁大負擔點行得郁呀？搞到拍劇時肥到企唔番起身，仲畀某導演當眾奚落太肥，話佢：「再肥啲16：9電視機都放你唔落！」顏面何存呀？有窿都捐唔入啦！雖然係Mean咗啲，但人哋佔一個身位，你就Double分量，個景係難攞啲！唔止返工畀人羞辱，仲要冇騷出，手停口停，搞到畀無綫追番啲騷錢，幾乎落難街頭咁，誇張到要朋友接濟之餘，堂堂宅男女神都要貼地落區，喺點心店做侍應Serve客賣蝦餃燒賣！人財兩失，冇嘢撈又冇仔溝，出街又畀人眼睥睥以為佢係大媽，真係踩到上心口！

呢3年就好似打日本仔三年零八個月咁難捱，但苟芸慧就係唔輸得，咬緊牙關頂落去，終於解「降」成功，成個人脫「胎」換骨，條腰嗰幾條「士啤胎」都冇埋，唔知係咪還番畀城城，話晒城城咁多架靚車嘛！減肥成功唔易，但更難得係搵到條大水喉、仲講明視佢為結婚對象嘅疊水男友射住，終於可以「破解萬年處女密碼」，簡稱「破處」，我真係恭喜你呀！

上大床再上天堂

重新再上「神枱」嘅索苟雖然就嚟34歲，但就學啲o靚模上大床影性感寫真，慷慨解「胸」典床典席，搞到班宅男再次當佢神咁拜，封佢做性幻想對象，連佢自己都衝出嚟，話要出寫真教吓班姊妹點樣「來回地獄又折返人間」，最後仲上埋天堂添！又抵佢咁得戚嘅，佢嘅經歷絕對勁過被全港網民唾棄，但又出自傳嘅25歲「宇宙巨G.E.M.」鄧紫棋啦！你估呢個翻身易o架？一個唔小心就真係撻到攤攤腰，輕則再沉多幾十米，重則就石沉大海，永不翻身！

苟芸慧踎低起到身仲成功大翻身，今鋪呢個華麗轉身就博得全港網民掌聲，個個都爭住做佢嘅裙下之臣，仲唔係盡情攞彩、報仇雪恨？不過呢次大逆轉竟然嚇到佢見過鬼後勁怕黑，唔敢再做女神咁話！但「一日女神，一世女神」，同啲腩肉一樣，唔係話搣就搣得甩！計我Nuts哥話齋，佢應該好好珍惜「女神」呢個朵，因為女神放嘅屁係香，做乜都有讚冇彈，攞晒免死金牌！

Nuts哥