天后瑪莉亞卡里傳與細13年的舞蹈員男友Bryan Tanaka結束5個月情，據知因瑪莉亞難頂男友大使性格，已厭倦成為對方的「提款機」！Bryan亦不滿瑪莉亞與前夫Nick不時單獨約會，醋意大發經常吵大鑊。
現年47歲的美國流行樂壇天后瑪莉亞卡里（Mariah Carey）去年與澳洲富商帕克（James Packer）甩拖後，即搭上細13年、昨日34歲生日的舞蹈員Bryan Tanaka，可惜5個月的姊弟戀話咁快就被傳玩完！有指分手原因除與瑪莉亞的視星前夫Nick Cannon有關外，更因Bryan長期當女友是「提款機」所致！
Bryan與瑪莉亞收入懸殊，Bryan的衣食住行全由瑪莉亞「科水」，曾有報道指瑪莉亞除每月出19.5萬港元糧畀男友外，男友所買的名牌衫褲鞋襪、手錶、珠寶亦全由女方找數。瑪莉亞已厭倦男友大使性格，認為Bryan只是貪圖其名氣而非真心愛她！據知兩人自上月底在墨西哥Cabo共度後，一直都冇再交談過。
至於Bryan亦一直呷醋瑪莉亞與前夫Nick的關係，皆因二人不時與仔女一家去旅行、食飯外，瑪莉亞更會與Nick單獨約會，而Bryan為反擊亦跟其他女性調情。最近一次令Bryan不快是上月，瑪莉亞與Nick帶埋仔女一同出席Kids' Choice頒獎禮，有指Bryan覺得女友「四位一體」完全漠視其感受，在頒獎禮期間更致電要求她返屋企！
Nick前日受訪時，笑指大部分男人都妒忌他：「我講笑啫，但我（對瑪莉亞分手）乜都唔知。對我嚟講，無論如何，瑪莉亞都係個美好嘅母親，我哋就專注關心仔女！」他亦再次重申唔知咩事，更笑言自己亦有好多感情問題。
而瑪莉亞就暫未回應「分訊」，不過前日就宣布「喜事」，將於今年內推出新碟：「我好開心開工做新嘅音樂，希望你哋同我一樣興奮！」她又表示會全心全意做更多音樂，揭開新一頁。
文：外娛組