「小王子」早到葉翠翠踢晒腳
前港姐葉翠翠前晚剖腹誕下重7磅的兒子「小王子」，但她透露其實預產期是在4月底，如今搶閘出世打亂計劃，原來已聘請的陪月員要5月才上班，令她相當頭痛，準備一腳踢湊仔兩星期。
35歲前港姐葉翠翠於2015年下嫁圈外建築師老公周曉東，一直嗌造人的她終在去年成功，前晚誕下重7磅半的兒子「小王子」！不過，原來翠翠的預產期是在4月底，如今搶閘出世，令她一度擔心仔仔的身體狀況，她說：「前晚穿咗羊水，我問老公點算，佢又問番我轉頭！好彩已經執好咗走佬袋，我哋就急急腳入醫院！」幸好醫生表示兒子的體形本來就比同周期的BB大四周，故提早出世亦不會有過輕的問題，翠翠笑說：「醫生叫我唔使擔心，仲話足月出世嘅話可能會成9磅重！」
陪月未到
翠翠表示老公有陪入產房並親手剪臍帶，又笑謂當時太緊張而沒有感動到喊：「我緊張到唔知做緊咩，老公就好開心，一見到BB就話好似佢。」問到老公有沒有送禮來獎勵她？她笑言有BB已經足夠。
不過，翠翠就為陪月問題而頭痛，因預產期是在4月底，所以聘請的陪月員安排在5月上班，如今兒子提早出世打亂部署，她說：「陪月最快都要5月先到，呢兩星期會自己湊，屋企人會幫手，老公就要睇佢工作安排！」
文：影視組