同祥嫂破冰搞唔掂 兆尊唔驚夏蕙BB分身家
要講九十年代有咩集體回憶？點會少得1997年鄧家爭產事件！「慈善伶王」新馬師曾遺孀洪金梅（祥嫂）同以鄧兆尊為首嘅四個仔女爭產事件到依家，即係香港回歸同祥哥逝世都足足廿年，是非繼續loop唔停。薑愈老愈辣，食鹽多過我Nuts哥食米嘅祥嫂，開口埋口話讀書少，但周不時金句王上身，你點會諗到佢以「名種狗」嚟妙論啲仔女先？佢話屋企嗰八隻係名種狗，同佢同祥哥生嘅一樣係名種喎！佢仲先後騎劫人哋嘅喪禮、壽宴甚至聯歡晚會，搶晒主人家fo「踩場講話」！唔單止兆尊慨嘆：「佢連我未出世都有得鬧嘅！」就連對住記者，祥嫂都係答非所問：「問咩都好，祥哥翻生嘅，我一定答你，跳脫衣舞都得！」倘若邊個再問落去，真係中晒新馬師曾嗰句：「福心呢，好心呢，可憐吓呢個盲眼乞兒仔啦！」
老人家有錢有傍友
要講福心同好心，祥嫂嘅生死之交黃夏蕙一定有，明明自己仲生勾勾，但就被祥嫂手指指大大聲話佢該死唔死喎！難得夏蕙BB完全唔care，簡直係有個真正朋友的確好極！但祥嫂都好識做，之前都捐咗一千萬畀夏蕙BB個基金。早幾日我Nuts哥同兆尊吹開水，傾開夏蕙BB同祥嫂friend過打band，講笑問兆尊擔唔擔心祥嫂將啲錢畀晒夏蕙BB時，兆尊一副淡定有錢剩，佢話：「唔擔心！一個有身家嘅老人家，老咗有啲錢，身邊總有幾個朋友傍住！」嗱！嗒真啲啦！好多人有啲錢時，真係寧願有傍友好過有朋友，朋友會講真說話，即係未必句句啱聽啦！傍友講乜都零舍啱feel，仲可以將佢搓圓撳扁，即係叫佢去死都得（口架）！話時話，雖然兆尊話唔擔心夏蕙BB爭產啫，但話晒係老竇辛辛苦苦搵番嚟，係鄧家基業，有咩差池畀晒外人就唔抵啦！兆尊就話：「唔擔心得咁多，佢點用係佢嘅選擇！破冰？搞過喇！唔得，啲細佬妹都傾過搞過，唔係我問題！」
女人永遠是對的
雖然兆尊話唔係佢問題，但講到底都係佢唔啱！枉佢同時冧得掂大婆、二奶同三奶，願意三女共侍一夫，但原來兆尊根本唔明女人個腦係點運作！早排十歲童星陳學文喺余文樂部戲度講咗句：「你唔使做錯啲咩（口架）喎，啲女人話你錯，你就錯（口架）啦！」人仔細細都知呢個道理！兆尊都50歲人，唔係仲去深究祥嫂嗰句：「當年佗兆尊嗰時跌親，所以依家有腰患。」到底責任誰屬嘛？黃子華話齋：「邊個最鍾意記住啲唔開心嘅嘢？母親！」所以，阿媽講乜都好，做仔女嘅hea答已經係最好嘅回應。
Nuts哥細細個就知道，阿媽，英文「Mother」，呢6個字母，有人拆解話「阿媽畀上百萬（Million）樣好嘢，係唯一（Only）教導（Teach），畀個心（Heart）畀對眼（Eye）仔女又永遠正確（Right）嘅人」，辛苦晒喎！唔使咁複雜，「Mother」其實就係「Manipulate other（操控他人）」，「就食飯，仲食薯片」、「夜一夜都唔瞓，聽朝又試屎淋尿瀨」、「着多件衫，冷病畀屎餵你」、「飲汽水啦，糖尿病你就知死」……冇人會傻到同阿媽理論，贏咗場交，輸咗個媽，值得嗎？
Nuts哥