張兆輝拖「高挑曹敏莉」原來係阿女！
形象一向正派的張兆輝近日被傳有「桃花埋身」，多次被目擊有嫩女同行。家有嬌妻的他昨午被發現拖女暢遊貝沙灣，在海邊放狗、玩自拍，更一杯雪榚兩份食，全程懶理旁人目光，認真Sweet爆！張兆輝受訪時澄清這個「美麗的誤會」，他說：「嗰個係我囡囡，生得高大，所以惹人誤會咋！」
張兆輝與陳松伶合拍的無綫新劇《全職沒女》現正熱播，首集收視有23點，成績不錯。劇中飾演型爆酒店CEO的他多女埋身，想不到現實生活中同樣不愁寂寞，近日多次被發現有嫩女同行！昨午約4時許，家住貝沙灣的張兆輝與「嫰女」再次出動，兩人在數碼港海旁玩狗，長相酷似前港姐冠軍曹敏莉的「嫰女」年紀看似16、17歲，加上身形高挑，與張兆輝相當合襯！
頭貼頭Selfie
放狗期間，張兆輝不時掏出逾萬元的私伙相機為「嫩女」留倩影，兩人又頭貼頭玩Selfie，全程「蜜蜜傾」。暖男上身的張兆輝忙於「湊女」，對愛犬亦照顧有加，不時抱着牠東奔西跑。兩人身形高大，不時惹來途人行注目禮，但張兆輝一於懶理，完全沉醉在二人世界中！未幾，兩人移步到附近商場醫肚，「嫩女」一支箭衝去買雪榚。雖然買了兩杯雪榚，兩人卻你一啖、我一啖，公然「互餵」，認真溫馨！
不過，據本報翻查資料所得，「嫩女」其實是張兆輝的掌上明珠張卓姿（Twiggy）。身高5呎6吋的Twiggy，外形似足曹敏莉，拍埋老竇身邊都到他耳仔高，並肩而行似足情侶，難怪惹來這個美麗的誤會！張兆輝事後接受電話訪問時亦不禁笑說：「都聽到有人話我近日公然拖女，咁我個女又生得高大，難怪惹人誤會，但其實佢今年得12歲咋！（咁有星味，畀佢入行？）我成日同對仔女講，無論做乜嘢都好，首要係讀好書，唔好似爸爸咁讀得書少。如果我有我個仔英文咁好嘅話，我走去拍荷里活電影啦！」
明年赴英升學
據悉，卓姿對藝術方面較有興趣，明年將赴英國升學，未來有可能入行繼承爸爸衣鉢。張兆輝自言會是呷醋外父，笑說：「好彩我個女話拍拖嘅嘢遲啲先講，佢咁有分寸，我都唔擔心！（接受佢嫁外國人？）嫁乜人佢鍾意啦，但要有事業同經濟基礎先得，拍拖要帶番屋企畀我睇吓先，話晒我閱人無數！佢喺娘家畀我捧喺手心，當然希望佢嫁得幸福，一生無憂啦！」卓姿身形高挑，17歲的哥哥原來亦有6呎4吋高，志願是成為飛機師，張家可謂一門兩傑！
文：影視組