楊愛瑾早產誕子即嗌生多個

去年四月下嫁永安太子爺郭永淳的楊愛瑾,昨日公告已於上月底為老公順產誕下兒子,因為囝囝比預產期早了半個月出世,令她一度緊張,慶幸生仔過程非常順利,她更心急生第二胎,希望早日為老公湊成「好」字。

今年32歲的「餅碎」楊愛瑾(Miki)一索得男!繼周汶錡、蘇永康太太、謝安琪、車婉婉先後誕B後,Miki昨日在社交網報喜,已在上月30日為老公郭永淳誕下囝囝,BB的乳名叫LuLu,Miki以英文留言,意思指BB急不及待要來到這個世上,所以早了出世!他們好期待遲些帶LuLu出來跟大家見面!Miki表示囝囝已經一個星期大,還透露囝囝一出世就眼仔睩睩,一雙大眼睛似足爹哋。

順產唔太痛苦

已經回家坐月的Miki,受訪時指囝囝比預產期提早兩星期:「BB上個禮拜已經出世喇,因為BB早咗兩個星期出嚟,佢出世未夠六磅,但醫生話佢身體一切健康,叫我哋唔使擔心。」Miki又談到作動的情況:「上星期朝早突然發現BB有想出嚟嘅先兆,成個人都變得好緊張,孭住走佬袋入到醫院,我一直都好擔心順產究竟係點,好彩醫院嘅醫生同護士都講解得非常專業,過程一切都非常順利,冇我想像中咁痛苦,生完嗰一刻,我仲即刻講笑咁同老公講:『咦!可以即刻生多一個喎!』」

新手媽媽呻忙

Miki透露囝囝的英文名叫Luken,意思是「bringer of light」:「佢喺產房一出世就已經眼仔睩睩周圍望,好似想快啲見到我哋咁。」Miki表示如今每日都好忙碌,好多東西要學:「所以同大家報完喜之後,我哋又要繼續努力喇!」

文:音樂組