何哲圖力撐絕不雪藏:又唔係咩大件事!

爆出「一腳踏兩船」事件後,「星夢」揸Fit人何哲圖前晚已開腔力撐鄭俊弘(Fred):「男未婚女未嫁,求婚都唔出奇。」並替Fred澄清:「佢同何雁詩只係好朋友。」而他昨日出席活動時表示已向Fred了解:「成件事係一段認真感情(指Fred與『未婚妻』),但關係已過咗去,大家相處三年買晒戒指求婚,但唔擔保可以開花結果。」又承諾不會雪藏Fred。至昨晚Fred現身返唱片公司,親自接他上樓的何哲圖被問到會否向Fred「照肺」?他說:「唔會,成件事佢都有講。」至於談到Fred身邊的朋友都不知他有「未婚妻」?何哲圖明顯前言不對後語:「嗰個唔係未婚妻,係女朋友。(求過婚?)唔出奇,但未結婚。(咁何雁詩係咪女友?)唔係。」對於Fred現時形象跌至谷底,何哲圖說:「谷底你哋講啫,又唔係咩嘢大件事,同女朋友分手啫!」

而Fred同門歌手譚嘉儀,早前與他及何雁詩齊齊出埠拍攝無綫旅遊節目《這個冬天不太冷》,她接受電話訪問時表示不知二人拍拖:「唔覺嗰時佢兩個有異樣,可能我掛住觀光。」又表示沒有聯絡二人,她說:「佢哋暫時需要私人空間,相信呢件事對佢哋心情唔多唔少有影響,感情係兩個人嘅事,等佢哋自己處理。」問到會否覺得Fred愛溝女?譚嘉儀說:「眼見就冇囉!(佢有未婚妻?)唔知,不過佢好有男士風度。」