Aka Heidi簽電影公司學功夫拍戲
組合Super Girls（SG）去年各自踩入影壇接拍電影及網劇，近月多間電影公司向隊長Aka及Heidi招手過檔，SG所屬的經理人公司Jam Cast見兩女對電影有濃厚興趣，忍痛將親生女SG分拆，更以半賣經理人約將Aka及Heidi簽約另一間娛樂製作電影公司，至於其餘三名成員Cheronna、Yanny及Jessica亦有新安排。
歌影視多棲發展
Aka昨日接受電話訪問大方承認簽約電影公司，她說：「係簽新公司，好開心有人賞識。」隨即大讚公司配套全面，Aka說：「依家做歌手要多棲嘗試，可能要歌、影、視一齊發展，公司仲好好安排普通話同功夫堂畀我哋，可以打入內地市場，對我前途有個好憧憬。」並許下承諾說：「一定會好努力，唔怕辛苦去學、練習同做嘢。」
問到SG會否拆夥？Aka否認說：「唔會拆夥，音樂上一齊做，電影方面得我同Heidi簽咗新公司，出席活動同唱歌都會一齊。」問到會否覺得Jam Cast似賣豬仔將她賣給新公司？Aka說：「唔會，反而好感謝佢哋同電影公司合作，睇到我嘅前途有多啲發展，唔係賣豬仔，Jam Cast仍然會幫我接工作同唱片事業。」
文：音樂組