歌迷5千蚊買黃牛票 祖兒嚇到O嘴4度安哥破紀錄
容祖兒舉行side track演唱會，有歌迷自爆花了5,000元買黃牛飛來捧場，令祖兒嚇到O嘴：「可以去東京啦！」並一再Encore唱多首歌回應歌迷的要求。
天后容祖兒假演藝舉行的《容祖兒．MY SECRET．LIVE》，大前晚第六場演出時，她兩度Encore（安哥）後，觀眾仍意猶未盡，祖兒叫大家給她一個滿意的理由才會再演唱，觀眾即不停大叫「好X你！」「你好靚！」「愛死你！」等，但祖兒統統唔收貨，笑說：「我知我靚，『好X我』呢個都唔係理由啦！唔X我都唔會入場啦！」突然一位坐最後排的女觀眾大叫：「我買黃牛飛入嚟o架！張飛成5千蚊，求你唱多首啦！」祖兒聞言O晒嘴說：「吓？5千？可以去東京啦，你做咩咁傻！」女觀眾表示因為愛祖兒，祖兒立刻為她再Encore一首歌，她說：「哎呀，咁我點都要唱多首送畀你！下次唔好喇，咁貴唔好買！」而是次演唱會最貴的VIP門票是1,080元。
加場行善變賣花女
另外，祖兒前晚的第七場演出獲好友李克勤、黃偉文、王祖藍、王菀之、鄭欣宜和許廷鏗等捧場。雖然原定每晚只Encore一首觀眾點唱的歌，但因觀眾反應熱烈，愈唱愈興奮的祖兒唱到欲罷不能，一首接一首，破紀錄Encore了四次！
完成演出後，祖兒於社交網宣布將於4月5日加開「特別場」，鼓勵歌迷努力撲飛，而這場的收益扣除開支後，會全數撥捐「容祖兒慈善基金」，祖兒更會將舞台上心愛的鬱金香花海布置品義賣做善事，5號晚起於場外設有鬱金香花束的義賣活動，她說：「啲鬱金香喺我個花園摘出嚟！如果大家鍾意就一齊共襄善舉，買返屋企留念啦！」
文：音樂組