春風滿面講心穎 馬國明拍拖減壓
與黃心穎「發展中」的馬國明，昨日滿面春風地與蔡思貝等宣傳新劇《心理追兇Mind Hunter》，他笑言在劇中「愛到有幻覺」，而現實中則會想方法減壓，問到拍拖是否減壓方法一種？他坦言：「都係嘅！」
馬國明、蔡思貝與敖嘉年等昨日到鑽石山宣傳新劇《心理追兇Mind Hunter》，早前病倒的湯洛雯未有現身，王君馨亦因工作缺席。馬國明與緋聞女友黃心穎最近因合作新劇《宮心計2深宮計》而朝夕相對，被取笑「春風滿面」，問到戀情是否如女方所言「開展中」？他笑說：「佢講啫！依家唔係同佢拍，主要同蕭正楠多，同心穎暫未有戲！」
以往多演搞笑戲的他，今次在《心》劇要多思考：「角色背負多，演我女友嘅湯洛雯被害死，所以我成日沉淪喺幻覺中，會見到湯洛雯出嚟同我傾偈，都幾詭異！（現實中會否因掛住女友而沉淪？）我就未試過。（深情？）唔知，現實中我會放鬆啲，做運動減壓。（拍拖係咪減壓？）都係嘅！但同家人一齊都係減壓。」
蔡思貝篤爆「兇手」？
至於蔡思貝被問是否劇中兇手，她竟口快快「劇透」說：「個兇手今日冇嚟！」剛巧王君馨缺席，似乎意有所指！此外，問到君馨有否透露婚訊？思貝說：「真係唔清楚，佢好忙，我都唔知佢幾時搞婚禮。（羨慕？）呢一刻冇，婚姻同工作可以並存，但我想做好工作先。」談及另一演員湯洛雯日前在街上暈倒，她說：「似係工作壓力大！我嘅減壓方式係喊，會大笑大喊、唱歌、做運動，有時小毛病好似耳鳴都會有，主要係唔夠休息。（喊得多唔多？）我係水瓶座。」
文：影視組