提起聯絡又嗌暈 祥嫂借名種狗比喻仔女
粵劇名伶新馬師曾的遺孀洪金梅（祥嫂）繼魯芬喪禮、粵劇名伶紅線女大徒弟郭鳳女壽宴後，昨晚「踩場」向子女發炮！她在好友黃夏蕙陪同下，昨晚現身新馬師曾徒弟黎駿聲的聯歡晚會。談到將現居「永祥苑」改建「伶王新馬師曾藝術紀念館」，有備而來的她竟將仔女與狗相提並論：「建館嚟講，我係首次，學識薄弱，不過唔使眾籌，我拎得出！館址佔地３萬幾呎，我暫住啫，第時會帶埋八隻狗搬出，佢哋係名種狗，同我同祥哥生嘅一樣名種！（歡迎仔女參觀？）梗歡迎！我哋冇嘢，仔女不知幾孝道！所有事過咗，以前係人為因素，簡單複雜咗啫！（有冇聯絡？）你咁樣唔得喎！我又暈又腳軟啦！我思緒紊亂，讀得書少，唔識答！」
當追問祥嫂有關鄧兆尊以4.8億元放售地皮一事，她突然握着記者的手說：「真係要同你跪安呀！我體諒你，但我感冒，未睇資料啊！」其後突將話題轉到徒弟，祥嫂說：「徒弟好似半邊仔，多個都好！」
另外，祥嫂早前向黃夏蕙的慈善基金捐款1,000萬，黃夏蕙指基金本來打算於4月15日成立，但現要改期：「啲帖印唔切，復活節又多朋友出門，依家改喺7月8日搞！」