自古送禮表心意，荷里活眾星相當明白呢個道理，土豪式一擲千金之餘都不忘加添心思，唔送金鑽相架與水晶杯呢啲行貨，細至奢華性玩具，大至連鎖快餐店分店甚至整個心形小島都冇手軟，誇張得嚟講金又講心！
美國真人騷女星Kim Kardashian與歌手老公Kanye West出名愛奢華浮誇生活，生日咁重要嘅日子當然唔可以忽視！Kim前年豪擲11萬美元（約85.4萬港元）租下洛杉磯史坦波中心（Staples Center） ，等老公Kanye可於NBA比賽舉行的場館與老友打波，父親節仲為老公送上已故Apple總裁喬布斯（Steve Jobs）與Steve Wozniak簽名的電腦滑鼠，激罕之餘又有紀念價值，冧到老公勁開心。
至於Kanye都好有老婆心，2013年送16,000美元（約12.4萬港元）名牌手袋，唔係一般手袋，而係印上視覺藝術家George Condo作品，變身獨一無二無價寶的手袋。Kanye玩質素亦注重數量，試過一次過透過助理送150份大禮畀老婆，包括大堆名牌晚裝與配飾等，拆禮物都拆到手軟！不過最浮誇莫過於2014年買下分別位於歐洲各地的10間連鎖快餐店分店，當結婚禮物送畀老婆，去到邊都係老闆娘，認真威水。
除了土豪式送禮，不少名人都花心思送上愛的禮物，例如曾經愛得轟烈的賴恩雷諾士（Ryan Reynolds）與史嘉娜祖漢遜（Scarlett Johansson），女方於賴恩31歲生日，送上鑲嵌了自己智慧齒的金鏈，成為一大經典禮物！至於祖狄羅（Jude Law）向絲安娜美娜（Sienna Miller）求婚時，亦將價值20萬美元（約155萬港元）藍寶石鑽戒收藏於鋼琴中，用大禮包裝「大禮」。
其實份份名人厚禮只講價錢都已經相當離地，但講到有錢都未必買到的，就一定係影星安祖蓮娜祖莉（Angelina Jolie）幾年前為仍未情變的老公畢彼特（Brad Pitt）送上價值1,220萬英鎊（約1.5億港元）、位於紐約北部外的「心形小島」佩特拉島（Petra），賀他50歲大壽。至於碧咸（David Beckham）被爆為愛妻Victoria送上價值180萬美元（約1,397萬港元）的白金性玩具，鑲有10卡鑽石做裝飾，普通人絕對玩唔起。
不少名人紅星愛送名車或豪華遊艇畀另一半，雖然老土但實用！天后Beyonce更加誇張，除了以200萬美元（約1553萬港元）買下時速高達253公里的名車Bugatti Veyron Grand Sport畀老公Jay Z享受速度感，又以4,000萬美元（約3億港元）購買私人飛機Bombardier Challenger 850賀老公過首個父親節，可謂終極大手筆！
《老友記》舊拍檔珍妮花安妮絲頓（Jennifer Aniston）與卻妮高絲（Courtney Cox）姊妹情深，送禮冧對方都勁大手筆。2008年卻妮為珍妮花送上單車，不過唔係普通單車，係搵來名牌打造座椅，價值12,000美元（約9.3萬港元）的單車。
文：外娛組