談善言光頭變攻擊性武器

談善言早前獲提名第三十六屆香港電影金像獎最佳新演員，可算是其努力成果，其實她為了電影，真的可以去到好盡。月前阿談接拍了一套慈善電影，要飾演腦癌病人，她毫不猶豫就答應剃光頭演出：「角色係腦癌末期，冇晒頭髮，其實我一直諗人生要光一次頭，由細到大未試過光頭，媽咪話胎毛都冇幫我剃過，因為頭髮唔多，驚剃完唔生，既然要光頭，要有啲原因先得，呢個角色係一個好理由。」

被造型嚇一跳

她坦言一開始不太習慣光頭：「好涼囉，剃完個頭好似發熱咁，出晒汗，摸落去又『腍滋滋』，好得意，係咪腦囟未生得埋？之後返到屋企，已經覺得有鬚根，摸上手似海膽，好有攻擊性！」就連男朋友也被她的光頭造型嚇一跳，她笑說：「我返到屋企，佢第一時間望住我，跟住瞇埋眼，係咁『咦』我，我戴番帽，佢睜大眼，我除帽，佢又合埋眼，好似唔想見到我咁，我話有冇咁過分？佢就話我好似馬騮，又好似和尚，仲話我似王祖藍！」被「激怒」的阿談，即用光頭反擊男友：「我皮膚易敏感，男友成日用鬚根整到我塊面起一撻撻，有咗呢個攻擊性武器，我就攻擊番佢塊面！」

為演活癌症病人，談善言毫不猶豫剃光頭。	談善言坦言唔慣光頭，成日覺得涼浸浸。	雖然談善言之前都係短頭髮，但一下子剃光頭真係好勇！

做足資料搜集

此外，為了演腦癌病人，阿談開拍前已做好資料搜集：「導演好好，有畀資料我，佢話呢個角色似經期前後咁躁，性格不可理喻，仲提供埋角色星座、細個生活同父母關係畀我。雖然角色難做，怕自己做唔到生離死別嘅感覺，但導演幫咗我好多。」至於拍戲底線，她就表明暫時三點不露。

文：李惠儀

攝：劉智源

場地：K.H.WorkHouse @ Tai Ping Shan Street Gallery

服裝：Amelie street

鞋履：house of avenues、Atsurotayama