無悔做Model秋元梢「潮」夢想進發

秋元梢早前來港出席時裝店開幕活動，並接受本報訪問。自小喜歡打扮的她，姐姐、哥哥與母親可說是她在時裝上的啟蒙老師：「佢哋都好鍾意時裝，我好自然就跟佢哋一樣愛上。小學時會慳食儲錢買衫，當時已經會一個人去原宿shopping。做咗模特兒之後就更加喜愛，我絕對係一個購物狂。我比較喜歡原宿風格，自己再加添不同元素，挑戰不同嘅造型。我以前試過punk、rock、street fashion或者係辣妹造型，由以往嘅經驗先造就現在嘅我，我依家嘅風格可以話係以前所經歷嘅濃縮版。」

黑長秀髮表現真我

擁有一把又長又黑秀髮的她坦言遺傳父母：「日本人都比較喜歡染髮同電髮，但我反而對自己黑、長直髮好有自信，我覺得除咗服裝，髮型都係一種自我表現嘅方式，所以就一直保持呢個髮型。」

秋元梢的父親是日本相撲界中最高級別的橫綱，給外人保守感覺，但想不到鼓勵秋元梢成為模特兒的人正是其父親。她說：「正式做模特兒之前，有做過兼職，大學畢業前夕，我就諗有咩工作係有趣，最後決定做模特兒，於是我就同家人講，佢哋都好支持。爸爸話模特兒係要趁年輕去做，與其將來冇做而後悔，寧願做咗而後悔！佢話無論任何事都會支持同幫助我。」

自費到巴黎睇騷

身為名人後代，秋元梢在工作上亦遇上不少挫折，後來才開始獲認同及欣賞。近年她主動自費到巴黎等大型時裝周，令大家感到她對時裝的熱誠，工作機會亦隨之而來。感情生活低調的秋元梢被問鍾情甚麼類型男士？她笑言：「我鍾意溫柔又不失嚴謹嘅男士，要識得照顧女生，我係一個直覺同第六感好強嘅人，第一眼就知道對方同我夾唔夾。」

文：名人組

攝：劉智源

場地及服裝：Kenzo