新手大姨媽李綺雯上網學湊B

藝人李綺雯早前「升呢」大姨媽！雖然之前冇湊過B，但照顧姨甥仔一樣有板有眼，她說：「我妹妹早產，新請嘅外傭又因簽證問題要遲啲到港，我做家姐嘅盡量幫手。其實我唔識湊B，靠上網學，又八咗啲湯水食療，八吓啲湊B知識，我發現養一個小朋友真係唔容易！而且我呢個姨甥仔好鍾意請大姨媽飲茶，之前買咗四包尿片，唔使兩個月用晒！佢仲成日瀨濕啲衫仔，搞到我要逐件洗，再用風筒吹！佢第時真係要好好孝順大姨媽呀！（享唔享受湊仔？）OK啦，我每次餵佢飲奶，都覺得佢個樣好開心！（一向受小朋友歡迎？）唔知呢，但之前拍劇扮演我仔女嘅小演員，都好鍾意黐住我！」