成龍:借奧斯卡之名見老友

去年獲奧斯卡頒發終身成就獎的成龍,本想低調不慶祝,昨日獲英皇老闆楊受成安排設宴恭賀,曾志偉及爾冬陞更為他廣邀好友如張學友、劉嘉玲、謝霆鋒等到賀,場面星光熠熠!

62歲國際巨星成龍去年獲奧斯卡頒發終身成就獎,成為首位獲此殊榮的華人演員!昨日由好友英皇老闆楊受成於灣仔設宴慶祝他獲獎,大批傳媒蜂擁而至。成龍受訪時透露自己對得獎一事低調處理,故曾多番推卻楊受成為他設宴的美意:「我唔想炫耀,想低調啲。楊生一直提議(指搞慶祝晚宴),我一直推,推到今次真係冇得推。曾志偉、爾冬陞、楊生做發起人,叫齊我幾十年喺圈裏面認識嘅圈內朋友出席。所以都係借奧斯卡之名,見老朋友為實!(太太林鳳嬌、兒子房祖名嚟唔嚟?)佢哋之前日日睇奧斯卡都睇到悶啦,個獎擺喺北京Office,冇拎過嚟,之後個獎會放喺上海成龍藝術館。」

問起小龍女速閃

談到其太太林鳳嬌及兒子祖名對他獲獎有何表示?他笑指二人Cool爆:「冇呀,你知佢哋不嬲都好Cool o架啦。我攞獎嗰日,祖名都冇恭喜我,但我冇嬲,頒完獎都有同史泰龍去食飯慶祝。」其後,成龍被問到有否留意日前「小龍女」吳卓林報警,令吳綺莉被捕一事?他說:「乜嘢事?做乜事?多謝大家。」之後以入場為由匆匆返酒店。據知其後原來有專人從內地將奧斯卡獎座拿到現場向成龍送驚喜,令他開心捧獎拍照留念。

學友恭喜城城結婚

晚宴除了有曾志偉擔任司儀外,到場賓客亦分量十足,包括張學友、劉嘉玲、謝霆鋒、黃秋生等,認真星光熠熠!當中學友被問到為何不帶太太羅美薇到場?他笑說:「搞錯呀,你哋明知佢唔會嚟屋o架啦,你哋有幾可見到佢嚟呀?」問他會否向即將結婚的郭富城送上祝福?他說:「我梗係會恭喜佢,唔通嬲佢咩!」而霆鋒被問到日前於K房唱《藍雨》獲讚,他笑說:「南乳炆豬肉就有。(好多人期待你開演唱會?)知道,盡快啦。」晚宴前設有酒會,劉嘉玲出席酒會後未知是否有工作在身,其後與施南生離場。而曾志偉約晚上十時許離開,他指慶祝晚宴上播放不少成龍以往的演藝片段,在場七成人都有喊,場面感人。

文:影視組