許廷鏗約大肚婆飯局紀念肚DumDum

歌手許廷鏗(Alfred)前晚上載一拖三個大肚婆的合照,原來他約了好友吳若希(Jinny)和謝安琪(Kay),加上同樣是孕婦的化妝師,促成這個「大肚婆飯局」!相中見梳孖辮的Kay仍然下巴尖尖,並穿上最愛的厚底高踭鞋,素顏的Jinny則穿平底鞋及連身短裙騷腿。

記者昨日致電Kay,她表示大家很少機會相聚,因為Jinny要專程從澳門返港,她說:「我又歸隱田園少出街,同埋我好懶,結果約到食飯好開心!我哋3個都係同一個化妝師,所以感情好好,咁啱我哋又一齊呢段時間有咗BB,一齊去到最緊張階段,所以出嚟食餐飯紀錄吓肚Dum Dum呢個階段!」問到可有交流懷孕心得?Kay表示當晚大家無所不談,又笑指Alfred是「食量型歌手」,大家懷孕後都食量大增,所以沒有強迫Alfred聽育嬰資訊:「好熱鬧,BB又喺我哋肚入面踢,今年又好多好消息,行內有好多BB出世,我哋好開心,亦都好戥人開心!」

吳若希又晒孕照

至於Alfred笑指自己旺丁,所以身邊三位女士都懷孕,更已臨盆在即。他又表示不清楚孕婦的飲食習慣,幸而Kay很在行,問到是否懂得照顧孕婦?他透露有親自送3人上車,亦有吩咐她們報平安:「咁多條人命喺我手,都有啲緊張!」

另外,Jinny日前晒大肚寫真火速成為熱話,不少網民都留言表示只看到其巨胸,她昨晚就上載巨肚特寫,並留言:「關於大肚相點解唔見肚~~我想還攝影師一個清白!」此外,Alfred昨日上載與鄧小巧及吳業坤的合唱短片,似乎是想借短片粉碎與吳業坤的不和傳言。