肥媽寸6號加人工 冇請食飯

藝人肥媽(Maria Cordero)昨日與陸浩明(6號)為節目《阿媽教落食平D》拜神,節目系列已經做到第六輯,肥媽自爆加人工:「勁呀,加咗Double!6號都加咗,我拍廣告又叫埋佢,應該畀番佣我,佢連飯都冇請我食一餐。」6號即笑說:「我做第四輯嗰陣已經續咗約加咗人工,去旅行都有買手信畀阿媽。」

被問到新節目有甚麼特色時,肥媽笑言:「今次由6號下廚,會煮一啲連呢個白癡都煮到嘅餸,一隻手指撳個電飯煲掣就搞掂。」問到可擔心與李家鼎的《阿爺廚房》比較?肥媽說:「冇得比,一個男人一個女人,我哋呢啲師奶嘢,佢嗰啲係講刀工,同埋唔需要比較,飲食節目百花齊放,愈多愈好,家庭愈溫暖。」