食叉雞睇《迷》大結局阿田 坤坤說嘉穎回巢
視后田蕊妮於熱爆劇《迷》的演技獲讚賞，前晚邀請同劇演員吳業坤及賴慰玲到家中一同睇大結局，並由老公杜汶澤下廚炮製佳餚，翹埋雙手等食的阿田笑指有幫手「吹水」。雖然男主角鄭嘉穎缺席，但眾人未有拋下他，更齊聲呼喚對方回巢再合作。
無綫熱播劇《迷》前晚連播兩小時大結局，劇情高潮迭起，劇中已漸漸殺人成魔的田蕊妮，因獲悉男友鄭嘉穎一直掌握其罪證，還欺騙她一同遠走高飛，結果承受不住再度精神崩潰。二人於天台講數期間，阿田不慎墮樓但不死被送入精神病院，嘉穎往探望時她又再瘋癲，又喊又笑，盡騷視后級演技，獲網友大讚演技精湛！前晚結局錄得最高收視點為26.5、平均25.7，成為全劇收視最高的一集。
滿意收視
阿田昨日出席影視娛樂博覽活動時表示滿意收視：「其實拍嗰時好驚，驚自己未夠好，嗰段時間好投入，有少少影響到情緒，好在本身我幾正面同樂觀，所以都抽離到，只係勁爆瘡啫！（期待攞視后？）時間尚早，呢個角色帶畀我好多嘢，所以對我嚟講已經係獎項。」
老公做大廚
忙於拍攝新劇《誇世代》的她，前晚難得早收工，即約埋吳業坤及賴慰玲到家中齊齊睇結局，並出動老公杜汶澤當廚師炮製撚手小菜，笑指自己幫忙「吹水」，故沒有入廚當助手：「老公煮得快手，兩、三個鐘搞掂，個主題係馳名叉雞飯，再加一碟菜心添！吳業坤食齋，就安排馳名素炒飯同豆腐乾。」阿田坦言拍攝時辛苦了幾個月，但獲得好口碑實屬很大的鼓舞，賴慰玲則大呼不捨：「拍嗰時都睇晒劇本，但今次睇番結局都好心痛，呢套劇大家都喊到九彩咁，拍得有啲辛苦，但睇到成果都覺得好值得！」吳業坤就賣口乖說：「第一次咁溫馨喺食飯嗰時睇，希望下次都有咁好嘅劇組。」
講到該劇乃鄭嘉穎目前於無綫的「最後一擊」，阿田就揚言希望繼續與對方合作：「今次好難忘，好多謝嘉穎，亦都好多謝監製王心慰，製作嘅幕後都唔簡單！一班編劇，寫咁多場呢啲戲，仲要冇破綻，真係一啲都唔容易！」吳業坤就搞笑說：「想同嘉穎多啲對手戲，希望佢為我回巢啦！」
文：影視組