湊B責任大 樂基兒：冇諗住生！
名模樂基兒昨日穿小背心一身夏天氣息出席活動，以行動支持領養寵物，現場她又抱狗又抱天竺鼠，即使衫上黐了鼠毛亦不介意。樂基兒透露美國有一頭貓，男友在港有兩狗兩貓，寵物之間相處融洽，並考慮再領養，她又提到媽咪以前很怕小動物，不喜歡貓，但自從領養貓貓後，變到好鍾意小動物。
問會否因為養小動物而不生小朋友？樂基兒說：「係兩件唔同嘅事，暫時冇諗住生，冇生小朋友嘅計劃，順其自然。（同男友有共識遲啲先？）唔知，順其自然。（唔鍾意小朋友？）同小朋友玩得好開心。（係咪想先結婚後生小朋友？）現今社會，有啲人生咗小朋友未結婚，有啲結咗婚好多年都唔生小朋友，有啲連婚都唔結，唔係咁大不了，如果真係有小朋友，覺得責任大，要成為全職媽咪照顧佢。（你有小朋友會放棄工作？）會。」
