張曦雯谷胸魔女犧牲色相
「無綫小花」張曦雯（Kelly）昨日以性感女魔王造型現身無綫網劇開鏡，谷胸配黑絲騷長腿的她非常養眼，自言於劇中癲倒眾生，但實情卻有苦自己知，戴上紅色隱形眼鏡演戲的Kelly，看到的全是紅色，再加上鐵鏈及骨頭道具全是真材實料，名副其實眼又攰手又攰！
藝人張曦雯、馬國明及鄧佩儀等昨日齊為無綫big big channel網劇《降魔的番外篇──首部曲》開鏡拜神，以女魔王造型現身的Kelly谷胸上陣，既露背又騷黑絲長腿，並手拿鐵鏈兼戴上紅色隱形眼鏡，令同場造型密實的鄧佩儀即時被比下去。
鄧佩儀封胸靠演技
首度演奸角的Kelly於劇中癲倒眾生，但實情有苦自己知：「戴住個紅色Con，睇嘅全部都係紅色，所以要時間適應，啲鐵鏈同骨頭道具都係真嘅，佢哋用動物骨頭，鐵鏈又真係鐵，好重，所以到時會演得好投入。（要唔要操弗身形？）都要，因為都多動作，所以想弗啲！（拍之前知唔知要性感？）都冇乜所謂，角色需要做惡魔，如果包到實就唔似啦！」
飾演Kelly妹妹的佩儀，預告將與Kelly有對打戲份，問是否角色不用性感？心口有少許透視的她說：「今年興透視，劇入面我要吊威吔，密實會安全啲。（接受唔到性感？）劇情需要都可以，但今次我做純真魔女，服裝都會配合性格，到時會用演技去吸睛。」
馬明等心穎送車送樓
至於與黃心穎緋聞甚囂塵上的馬國明，獲Kelly及佩儀左右傍實拍照，艷福無邊，問可擔心激嬲心穎？他笑說：「唔驚，點會驚？拍劇啫！」對於心穎被拍到買男士銀包，問到可收到禮物？他說：「真係唔開心，都唔係送畀我。（可能未送呢！）可能唔係呢，我都想！（心穎有冇買過嘢畀你？）印象中有，但唔記得咗！我等緊啲其他嘢，好似送車送樓。（你都有！）唔會嫌多。」談到心穎「投訴」他未有再約會她，被指進展緩慢，馬明笑指有機會亦想主動再約會，亦想了解銀包接收者是誰。
文：影視組