蔡加讚諗頭多發夢可成真

近年不少名人二代都有創業大計，繼賭王何鴻燊三房兒子何猷啟開發新App、上海四大家族盛宣懷後人盛品儒搞VR遊戲、葉澍堃兒子葉瀚華開餐廳闖飲食界，年輕人都希望搞興趣事業，不過現年31歲的蔡志明兒子蔡加讚（Karson），當年於美國南加州大學政治經濟學系畢業後，便直接加入家族旗下公司。他說：「自己由細睇住爹哋返工做嘢，睇到佢做嘢好辛苦，又要應酬，幫佢手呢個係我嘅抱負，好想幫輕佢嘅重擔。第二，呢個亦都係我嘅責任，父母對我有要求，所以自己一畢業就好想返公司做嘢。」

有興趣搞環保

當Karson完全掌握公司的運作和管理後，才慢慢發展自己有興趣的事業。Karson喜歡腕錶和汽車，故年前創立喜運佳‧譽一鐘錶店及開設汽車廣場，問到還想發展甚麼興趣事業？他說：「會考慮環保，依家資源缺乏，環保市場發展好迅速，好似垃圾循環嘅生意，將垃圾變成另一樣賣到錢嘅嘢，又或者做有機蔬菜，自己都鍾意。（發展太空事業？）有諗（口架），有機會發吓夢，呢個係幾遠嘅目標！所有發明家都係因為肯發夢，我以前都發過夢，好想有自己嘅品牌，又發夢做賽車手。睇電影《Toy Story》我會諗，係咪可以做出人工智能玩具？玩具會自己郁？如果成日諗唔可能，就真係唔可能！」他指現今人工智能發展得很好，亦是發夢的成果。

蔡加讚先打理家族生意，才慢慢發展自己事業，作風踏實。	蔡加讚出資重建童軍中心，名為「蔡加讚鑽禧館」，預計2018年啟用。	重視家庭的蔡加讚經常偕妻子與父母出席活動。

尊重子女興趣

Karson和太太汪圓圓婚後育有一女兩子，問到將來想不想他們接手家族生意？他說：「生意一代傳一代，當然希望過百年，甚至幾百年，但另一方面又好尊重子女嘅意願，如果佢哋有自己興趣，我一定支持同尊重。」

文：Tracy Leung

攝：司徒國榮