艾威孭飛受質疑 林熹瞳喊住撐
艾威、林熹瞳（Rachel）及張文慈（Pinky）昨日以中式結婚Look宣傳新片，當Rachel提到有人質疑艾威做電影男主角的能力時感觸落淚，艾威亦輕拭眼角，強忍男兒淚！
艾威、林熹瞳、張文慈、林聞恩（Mannyan）、周俊偉及張松枝等，昨日到深水埗宣傳新片《我老婆未結婚》。首次擔正男主角的艾威力谷電影，模擬踢轎門迎娶戲中兩位老婆Rachel及Pinky。身兼監製的Rachel談到艾威被人質疑做男一的能力時感觸落淚，令艾威與Pinky大受感動！
40年功力深厚
艾威形容自己心情忐忑：「感覺患得患失，呢套戲可以係我喺電影圈嘅開始，亦可能係終結，若果成績唔理想，變相否定之前40年嘅付出。40年唔簡單，我好自豪自己冇放棄過，有呢個資歷嘅人唔多！套戲嘅成績對於我、公司以及力排眾議要用我嘅Rachel都係挑戰，希望大家一人一票撐艾威，令我成功入閘！」而Rachel對於艾威被外界睇低，她說：「有人睇完好鍾意套戲，但問點解係艾威？我聽完好心痛！有觀眾覺得唔使錢睇咗40年綠葉王，使乜畀錢入戲院睇佢套戲。但佢第一次去到呢個位置，希望大家畀個機會！」
張文慈瞓身支持
Pinky則坦言會撐到底：「我同Rachel識於微時，佢好有才華，雖然我呢排要拍劇，但都向TVB攞個人情，請假嚟瞓身支持！艾威付出好大努力，希望全民撐艾威，香港嘅觀眾多啲支持本地作品！」Mannyan獻唱電影主題曲《看不見的存在》後，提到胞妹Rachel當眾落淚，她說：「頭先見佢對眼紅晒，但佢反而鼓勵我集中精神唱好首歌，我知佢好大壓力，自我要求又高，咁大project令佢瞓唔好。」
文：影視組