劉嘉玲搞電影 下令偉仔接戲！
影星劉嘉玲結束了飲食生意，滿肚密圈計劃開設電影公司，笑言「下令」老公梁朝偉接拍旗下電影，更不排除找「慢工出細貨」的王家衛合作。王導拍戲不擔心收工無期？嘉玲說：「會喺合約寫明，預期內拍唔晒，咪唔畀錢囉！」
嘉玲昨午偕佘詩曼（阿佘）、鄺美雲及名媛毛玉萍等出席新食肆剪綵活動，曾在尖沙咀開設餐廳的嘉玲，透露已將股權出售：「太辛苦嘞，我連上海嘅夜店都冇做，依家早睡早起，冇再去夜店，但我有繼續做時裝生意嘅，因為有興趣。」
搵王家衛 拍唔切唔畀錢
問嘉玲其實最想投資甚麼生意？她笑說：「我諗我最合適係拍電影。之前第一次監製咗部戲，雖然好辛苦，但獲益良多！」她直認滿肚密圈，短期內會有所行動，開設電影公司：「我諗我會拍女性勵志電影，同埋以人生遇到樽頸位為題材等。我人生有好多故事嘅，亦唔介意分享。（做導演？）呢樣唔會。（搵梁朝偉拍戲？）有啱角色都會，唔准唔拍！但唔會唔畀片酬佢，仲要畀多啲，加埋分紅，咁先公道！（搵王家衛做導演？）哈哈，有啱都會。（要畀好多錢同時間喎。）合約寫明，預期內拍唔晒唔畀錢，我冇咁多錢呀！」熱愛行山的她，昨早出門時獲偉仔傳來近日「山賊」的新聞圖片，提醒她行山要小心。
阿佘下廚 最叻煮泰國菜
阿佘表示曾向廚藝了得的母親提議開設私房菜，但遭拒絕，她可有承傳母親的廚藝？阿佘說：「媽媽同哥哥煮嘢都好叻，我哋會喺屋企比賽，一人煮一味，由阿嫂同姪仔做評判。（試過為異性下廚？）都有，一班朋友上嚟食飯。（最叻煮咩？）泰菜啦。」她與黃子華合作的新戲近日開始拍攝，子華更叫她請食飯：「嗰日佢話個銀包同電話留咗喺車，我見咁平冇所謂，一人一餐囉！大家合作好順利，估唔到七年冇合作，默契仍然好好。」至於早前因腳患以輪椅代步的鄺美雲，腳踏4吋船踭鞋現身，表示傷勢大致痊愈：「呢段日子停咗落嚟，可以重組一啲事，係有得着嘅，身邊朋友又煮好嘢畀我食，補充番啲骨膠原。」
文：影視組