柏德烈被篤頭怒扯「神棍」

荷里活兩大男星「狼人」曉積文(Hugh Jackman)與「X教授」柏德烈史釗活(Patrick Stewart)日前在北京出席新片《盧根》(Logan)宣傳活動,行紅地氈與「陸粉」近距離接觸,期間發生不愉快事件。在76歲的柏德烈為Fans簽名期間,有人不斷用自拍神棍伸到他面前兼「篤」親他的頭,工作人員已舉手阻擋,但支棍已差不多埋身,柏德烈一怒之下扯走支棍,隨即轉身離開,但亦有帶笑向傳媒直播鏡頭揮手。

有在場粉絲在微博大鬧:「就算唔係明星,佢都唔可以用自拍神棍嚟篤人個頭!如果篤傷人哋,你賠得起咩?基本嘅尊重禮貌去咗邊?人哋演員返去點睇中國觀眾嘅質素?可唔可以自律同自重啲?」