盧海鵬幾許瘋語反轉銅鑼灣

笑匠盧海鵬出名唱得，日前他為奇妙電視節目《放試》突襲銅鑼灣，與樂隊The Flame作街頭演唱。當他唱出首本名曲《幾許瘋語》，現場男女老少個個嘻哈大笑，反應比The Flame唱正經版《幾許風雨》更加熱烈，人人拍爛手掌。

人氣勁過樂隊

鵬哥對於一開金口即贏得全場爆likes，他自信十足說：「觀眾嘅反應大家睇到晒！佢哋唱同我唱差幾遠，邊有得比？我o靚仔嗰陣已經喺大陸街頭演唱，估唔到依家差唔多收山，又嚟街頭演唱，近十年八載都冇呢種機會，要唱都喺舞台上面，使乜喺街頭？但今次同新電視台合作，試吓唔同嘅嘢，嚟緊仲有其他測試，留意收睇啦。」

當日負責主持工作的簡采恩對鵬哥讚不絕口：「非常開心，我係第一次聽鵬哥唱現場，仲要係《幾許瘋語》，我細個睇電視有睇過，估唔到可以親身睇鵬哥唱現場。」

盧海鵬於街頭獻唱，吸引不少途人圍觀。

盧海鵬與向柏榮（左二）擔任拳賽旁述。

擔任拳賽評述

此外，鵬哥日前與資深拳手向柏榮評述拳賽，上陣拳手分別為向柏榮的11歲兒子及10歲女兒，比賽打足三回合，拳來拳往，戰況激烈，向柏榮的女兒更打到激動落淚，最終勝出比賽。

文：影視組　

攝：李柏儒