姜皓文冇錢交租漏夜搬竇
姜皓文（黑仔）入行超過30年，由電視演到電影，今年更提名金像獎「最佳男配角」，與一班老戲骨爭獎，雖被外界睇好，但他未戰先降，笑言對當晚冇獎攞「信心爆棚」！回顧30年演藝路，他自爆試過連四千蚊屋租都畀唔起而被包租婆鎖門，要漏夜搬竇；近年則試過拍戲險被木棍撞爆眼球。而他現時的最大心願是買層望海大屋送畀老婆，答謝她一直不離不棄！
黑仔屬圈中多產演員，在影壇打滾多年，由閒角發展到去年有十部電影上映，演技早已獲觀眾肯定，今年更獲下月舉行的金像獎「最佳男配角」提名，與曾志偉、秦沛、吳孟達及廖啟智等爭獎，但他直言沒信心，認為是開正戲路的曾志偉與吳孟達之爭！
黑仔過去30年演藝路上捱過不少苦頭，好像當年剛加入亞視的時候，由於每月只有幾千元人工，連交租都成問題，他說：「當時連屋租都唔夠錢交，成日避開個包租婆，最後避到佢忍無可忍，鎖咗我道門，要漏夜返去執嘢，再搵地方住。」
跳樓跳到驚
經過多年努力終成功脫貧，拍戲事事親力親為的他，多年來捱盡苦頭，除了為亞視台慶吊足三小時威吔，令大腿冇忽好肉外，還險些被打爆眼球：「前幾年喺內地拍《盜墓筆記》，個景有好多手造嘅機關，試過畀其中一個木棍機關打中左眼，好彩冇撞正眼球，但成隻眼瘀咗一大片，痛咗好耐。而拍《殺破狼2》就試過同吳京由幾層樓高跳落地下，由於導演好有要求，前後跳咗7次。我本身唔怕高，但跳咁多次都開始怯，好彩最後冇事。不過男演員拍打戲受傷在所難免，我唔會介意，亦唔覺得係啲乜嘢。」
心願買大屋
與太太金慧英結婚27載的黑仔很感激對方支持，就算自己試過情緒不受控，老婆依然不離不棄，而他近年已控制到情緒，疼錫太太的他直言現在最希望努力賺錢，買間望海大屋以答謝對方。
化妝： Mary Jane
髮型： Alex Chan@J.A.C.K. Timeless/Projetz 4
服裝： Philipp Plein
文：影視組