唐紫睿夠跆型當男友沙包咁打
女星唐紫睿（Hazel）近月找來跆拳道黑帶教練為她進行密集式訓練，跆拳初哥的她雖然打套拳時接連「蝦碌」，但踢靶、破木板則有姿勢有實際，早前經歷情海翻波離離合合的她自爆：「男友都唔夠我打！」
Hazel去年榮登ViuTV《G-1格鬥會》冠軍後，習武之心未有隨節目結束而停止，更找來跆拳道黑帶五段岑奶廉（Heman）任教練，Hazel說：「因為我想朝打女方向發展，跆拳嘅踢腳動作好靚，所以搵咗Heman教我，我學咗兩個月，好鍾意啲踢腳、踢木板嘅大動作，但練套拳我就覺得難，記得唔清楚，耍起嚟有啲『蝦碌』，可能我有惰性，唔夠勤力，但教練話學功夫要由根基學上去，唔可以鍾意學乜就學乜，唔鍾意就跳過，所以我工作幾忙都盡量一周上兩堂，我都想透過學功夫改善我嘅惰性！」
靠面口搵食
對於郭思琳表示想再與她在擂台上較量，Hazel說：「係咩？但呢類比賽我只會參加一次，依家冇理由再打，因為始終靠面口搵食，所以點解我當日參加就要求自己一定要攞冠軍！拍戲打就冇所謂，但要睇機會。（唔想衞冕第二季《G-1格鬥會》？）冇咁多時間去應付，而且要投入番拳手狀態要好多時間，過程好辛苦！不過開心嘅係我感染多咗人學拳，我師傅嘅拳館多咗好多學生，我覺得做咗件有意義嘅事，連男友睇完我比賽都搵我師傅練泰拳，可能佢成日被我當沙包，想學番啲嘢自衞，不過佢都唔夠我打，因為佢唔夠膽還手！」
教練評90分
Heman對於Hazel在跆拳道的發展相當有信心，他說：「第一堂我同佢講練跆拳好辛苦，佢答我：『一定得！』眼神有種堅持，練功夫好需要呢種火，我當佢係出去比賽嘅選手咁嚟訓練，愈艱苦嘅訓練，佢愈堅持，以學兩個月嘅水準同第一次踢板嚟講，佢有呢種腳法、力度，非常好，我畀佢90分以上！」
文：影視組
攝：司徒國榮