近期美國娛圈喜事重重，繼流行樂壇天后Beyonce宣布佗龍鳳胎後，現年55歲的荷里活著名男星佐治古尼（George Clooney）的39歲維權律師老婆Amal亦證實佗孖B！
美國著名華裔主播陳曉怡（Julie Chen）前日在主持的節目《The Talk》上，爆料指「古尼嫂」Amal佗孖胎，佐治與Amal暫未親自宣布喜訊。Julie說：「Beyonce並唔係唯一一個超級巨星佗孖B。恭喜佐治同Amal Clooney，《The Talk》剛證實佢哋將成為孖胎嘅父母，孖B將於6月出世，兩人結婚已兩年半。」據知屢次播種失敗後，去年夏天Amal選擇以人工受孕方式懷孕。雖然Julie沒有提及孖B性別，但有傳媒指是龍鳳胎！
查實上月Amal在倫敦出席一試映會時，因腹部微隆而傳大肚。上星期Amal 39歲生日，有傳媒在西班牙影到Amal肚凸凸與佐治及老爺奶奶一同慶生。有知情者指兩人知是孖B時略顯擔心，因原本認為生一個已足夠，但當知是龍鳳胎就感覺似中頭獎。「古尼嫂」佗孖B消息傳出後，有網友就P圖將佐治移花接木落大肚Beyonce個身度，相當搞笑！
佐治的好友、早已為人父的影星麥迪文（Matt Damon），前日在洛杉磯宣傳新片時亦證實消息，並指佐治從未叫他保守秘密：「去年秋天我同佢合作，佢拉埋我去一二邊同我講，我差啲喊出嚟，好替佢開心。」麥迪文表示當時問佐治，Amal懷孕多久？他即回答八周，令麥鬧爆：「你癲咗？唔好同任何人講呀！你唔知要12周先講得咩？」麥迪文笑指好友「攞苦嚟辛」，皆因有孖B一定唔使瞓。
除「古尼嫂」有喜外，《變形金剛：黑月降臨》（Transformers: Dark of the Moon）29歲英國模特兒女星Rosie Huntington-Whiteley，昨日亦於社交網貼上三點式大肚照宣布為拍拖7年的49歲英國動作巨星男友積遜史特咸（Jason Statham）佗B。
文：外娛組