伍靜麗玩動感單車叻到開班授徒

模特兒伍靜麗（Angie）除了對時裝熟悉外，原來亦擅長玩室內動感單車（Indoor Spinning），最近她更成為動感單車的導師，她說：「我一星期大約教四至六堂，有時一堂最多有四十幾個學生，一大班人喺室內跟住音樂踩單車，加入健身動作，再配合唔同燈效。」

Angie稱最初跟朋友試玩，第一次感覺很辛苦，但非常好玩：「因為會跟住音樂踩單車，令你做得更加劇烈，燃燒更多卡路里，而且呢個運動，唔單止用腳，仲可以配合唔同健身動作，又可以拎埋啞鈴去做，係一個全身運動。」

由興趣到成為導師，Angie表示花了兩個月時間上堂，星期一至五也要訓練四小時，她說：「除咗踩單車訓練，我仲要學上台講嘢，點樣去用聲等，最好玩係可以自己揀踩單車嘅音樂，覺得做導師好開心，可以接觸更多人，可以教人，又可以做埋運動。」