同氣連G崔碧珈夏尉喻證胸大有腦
橫看成嶺側成峰！36G「重型導彈」崔碧珈與35G「籃球胸」夏尉喻，同樣擁有「未見其人先見其胸」的驕人上圍，雖然精靈伶俐的崔碧珈與大智若愚的夏尉喻同為G奶，卻又花開兩朵，各表一枝，此「G」不同彼「G」！至於輸身材、贏EQ的34D林芊妤則覺兩人勁「屈機」！三個不同味道的女子，被ViuTV安排合作整蠱節目《胸Ｘ計》，試圖驗證廣東俗語「胸大冇腦」的真偽，三個女仔對「乳房總是讓大腦不能清楚思考」呢個議題又點睇？
崔：崔碧珈
夏：夏尉喻
林：林芊妤
勤「珈」運動操線條
林：呢個節目想探討「胸大冇腦」，我都唔知點解搵我？佢兩個真係令我好有壓迫感，見到佢哋，我都唔明我點解喺呢個團隊度，我唔大嘅，我真係唔大，唔夠你兩個。Anyway，多謝電視台邀請。我覺得有冇腦唔可以因為嗰個人身材而定，因為每個人智商都唔同，好睇個人，我都識啲好大個胸、但係非常聰明嘅女仔，例如崔碧珈，佢學業咁犀利，讀咁多書，所以我覺得「胸大冇腦」係唔啱！
崔：嘩，其實你都唔差，唔好咁樣講啦！我覺得胸大同冇腦係兩樣嘢，我又唔覺得呢四個字係一句成語喎，所以胸大同冇腦唔一定擺埋一齊。我覺得要睇番個人，有冇身材都可能聰明或者唔聰明。我算唔算胸大？我覺得自己係生得比較高大啲啦，差唔多接近5呎9吋，比較高、膊頭橫、骨架橫，但整個比例我覺得係啱嘅，所以冇特別覺得自己身材好。其實身材唔係特別指胸部，係指成個女人嘅線條，唔可以獨立嚟睇，所以我有做運動，手臂、臀部、腰部都有keep。
夏：我都絕對覺得胸嘅大細同個腦唔關事，因為胸係關乎遺傳基因，而個腦就係IQ嗰邊嘅，所以係兩邊獨立發展嘅事。點解坊間普遍會有「胸大冇腦」嘅誤解呢？我哋要透過節目幫一眾好身材女士平反！我覺得自己都係OK好身材嘅，不過我都希望隻腳可以再長多兩、三吋，咁就弗啲。
「芊」方百計要長腿
林：我覺得自己依家嘅身材OK，但係隻腳可以瘦啲，因為我教瑜伽，所以對自己身材好挑剔。可能人哋覺得我已經好，但我覺得自己可以更好。我覺得身材最緊要平均，腰要瘦、Pat要大、胸要大、腳要長，咁先至叫靚。如果你個胸好大，但你冇腰嘅，或者隻腳比例唔啱，我就覺得唔係咁好，所以我覺得身材好其實真係成個比例嚟講，咁我覺得自己仲可以進步啦！如果我隻腳有46吋就好，咁諗會唔會好貪心？
崔：哈哈哈，難咗啲喎，我諗你腿長46吋，驚你會唔開心喎！因為我比較高，喺香港工作呢幾年，如果話要着高踭鞋工作，我就帶定一對矮、一對高、一對平底鞋去，就番同場其他人高度。我唔知咁算唔算有腦，但我係好穩陣嘅人嚟，有時我開工拉個篋，係唔需要用到咁多嘢o架，但我覺得唔好理現場執生執成點，事前工夫做得足啲嘅話，出錯機會就少啲。我覺得自己係比較未雨綢繆，諗多幾步，因為我唔想輕易冇咗一個工作機會。
「尉」所欲為 hea看人生
林：我覺得醒唔醒唔係剩係睇IQ，仲要睇EQ。如果IQ高但EQ低，好易死人！我自認唔蠢，我EQ好高，例子係好多時記者問啲好尖銳嘅問題，令你難堪，以前我會亂答，因為嗰刻真係唔開心，依家會笑，自己踩咗自己先。我覺得人生好短暫，你只要用一個好似玩樂人生嘅態度去過就冇嘢。
夏：但我覺得我所有經歷都係好冇腦喎！我諗我最有腦嘅係知自己唔聰明，但我識得點樣去避開衝突同煩惱，避免問題發生。我個人本身有啲hea，懶得去做太多補救嘅嘢，如果可以盡量避免到啲問題發生就太好，呢個態度係我人生最有腦嘅選擇。
崔：呢個係以前試過太醒、太sharp，被人針對換番嚟嘅智慧？
夏：嗰時啱啱入行太多嘢唔識，唔知規矩。有時當你好熱誠去做嘢，唔多唔少會觸犯咗一啲人嘅禁忌，或者觸犯咗一貫做開嘢嘅運作模式。所以後來摸熟咗、了解多咗，就會體諒，但又未必完全可以配合，未必完全可以滿足晒各方面，咁我會選擇hea住面對，都係希望大家相處得舒服，又保持到合作關係。
後記：乳房令男人愚蠢？
幽默作家Dave Barry說過：「乳房主要的生物功能就是要讓男性愚蠢。」小記本來都被36G崔碧珈、35G夏尉喻及34D林芊妤愚弄得死去活來，但自言平日hea對人生的夏尉喻，原來只是大智若愚，她的一番肺腑之言，終於破解了「胸大冇腦」的真相：女人胸大，男人冇腦！
文：影視組
攝：吳文聰
場地：權八居酒屋