林奕匡唱冧歌未婚妻送心回敬

出道7年的林奕匡（Phil）前晚於旺角麥花臣場館舉行一連三場處男演唱會，吸引歌手糖妹、JW、樂隊Dear Jane成員Tim與老婆楊洛婷、蔡思貝前排舞師男友麥秋成與陳智燊夫婦捧場。曾主持電視台體育節目的Phil未婚妻李靄璣（Rikko），更與男友父母現身支持。

獲讚有才華

穿上短袖衫襯長裙的嘉賓楊千嬅甫出場即掀高潮，兩人合唱《再見二丁目》及《斗零踭》，Phil說：「冇諗過千嬅一口應承，一星期前都冇呢個單位。」千嬅笑說：「你公司想畀個驚喜你。」她大讚Phil有才華：「好佩服你嘅信念同把火，令我唔可以咁懶惰。」

之後Phil借歌曲《難得一遇》冧台下未婚妻：「呢首歌係寫畀一個人，呢個人陪伴我好多，唔只一個朋友、支持者，佢係我非常愛嘅人。」大銀幕即播出台下的Rikko，當他唱到最後兩句，更刻意向女友伸手，氹得對方做出心形手勢回禮。

文：音樂組

攝：鄭家俊