黃美棋玩謝鍾健威險搞出人命！
愛得甜蜜的藝人黃美棋及鍾健威，為慶祝元宵佳節，昨日孖公仔踩雙人單車兼到車公廟拜神求好運，美棋坦言拜年時被親朋戚友「全方位」催婚：「去到邊度都畀人催呀！」
藝人黃美棋及鍾健威（Ray）認愛後一直表現甜蜜，趁今日元宵佳節，二人昨日到大圍踩雙人單車兼到車公廟祈福。貪玩的美棋自薦載男友，雖然因身形嬌小而全程雙腳離地，但她仍逞強照踩，差點撞壆收場，全靠Ray用腳煞車才不致「搞出人命」，搞笑得嚟又Sweet爆！事後美棋更賴男友太肥，令Ray哭笑不得！
送蠔豉收買人心
談及早前農曆新年，二人透露有互訪對方家拜年，Ray更出動家鄉特產蠔豉「收買」美棋父母。問到有否被催婚，美棋直言被瘋狂催婚：「去到邊度都畀人催呀！佢哋叫我唔好再 (手豆)利是，佢屋企人、朋友都催我哋！反而父母唔捨得我咁快嫁！（有計劃結婚？）冇咁快，短期內都唔會。」而Ray則說：「我細佬結咗婚，個個都話我畀佢爬頭，其實唔好咁急啦！適當時機就會發生！」
轉風車祈求好運
踩完單車後，兩口子到車公廟轉風車求好運，身為樂隊sp'ACE主音的Ray祈求健康及事業運，又表示新一年會把工作重心放於樂隊上。而美棋則渴望拍電視劇，更自封「變態工作狂」：「我希望有機會拍劇，同埋我有啲變態，好鍾意好忙嘅生活，例如外景接廠景，廠景再接外景。（無綫有冇搵過你？）一路希望睇吓用咩方式合作，話晒細個曾經合作過。」
單車提供：亞運單車
文：影視組