嘉穎氣場勁嚇凸坤坤

無綫劇集《迷》演員鄭嘉穎、田蕊妮、吳業坤、賴慰玲、劉思希、簡淑兒及曾航生等，昨日在將軍澳宣傳，該齣是鄭嘉穎離巢前最後一套劇集，突破扮演小男人角色，田蕊妮笑說：「估唔到佢可以做小男人，你知佢平時氣場幾勁，企喺度三呎都冇人敢埋身，除咗我夠膽，吳業坤見到佢咩都凸晒出嚟啦！佢係好強勁氣場嘅人，但只要埋去打個招呼，佢一講嘢就冇事。」

冇表情好正常

鄭嘉穎則笑說：「都唔知點解，我乜都冇做過，淨係唔出聲，唔出聲就係冇表情，唔通四萬咁口咩！人哋以為我傻o架。（現實中係大男人定小男人？）都係做番鄭嘉穎，唔覺得係大男人。」新年時，嘉穎到了美國登台，出發前已安排好跟女友陳凱琳兩家人一齊食飯，回港後當然亦有到女友家拜年。

吳業坤承認嘉穎夠威嚴，自己未能輕鬆應對。

簡淑兒的招牌「腰果眼」非常可愛。

田蕊妮表示新年屋企賭局浪接浪，忙過開工，講到被拍到與傳情變的唐詩詠密談四個鐘，似向她大吐苦水，阿田笑說：「我同佢成日都食飯傾偈，人生唔係淨係得感情，仲有朋友、家庭、貓，傾四個鐘好小事，試過喺我屋企傾到過夜。（有冇傾到佢男友洪永城？）咁間中都有，但我係比洪永城重要嘅。（佢哋係咪分手？）唔知。（睇唔睇好佢哋？）我又唔係睇相，真係不能夠預測。」

坤坤最怕認真

至於吳業坤被問到是否害怕氣場強勁的嘉穎？他說：「嘉穎好係有威嚴嘅前輩，自己比較唔認真，好似唔識應對咁，嘉穎冇鬧過我，仲有提點我，其實《殭》都係佢引薦我拍，有場戲對白好長，拍完佢叫大家畀掌聲鼓勵我，只係我性格有啲怕好認真嘅氣氛，都要令自己成熟啲。」

文：影視組