Fit爆陳逸璇沙灘不敵「裸」女

歌手陳逸璇(Jolie)日前到布吉旅行享受陽光與海灘,美景當前她實行大解放,以比堅尼上陣大晒勻稱身段。不過,她嫌自己未夠弗,遠不及在沙灘裸曬的歐洲女仔!

歌手陳逸璇趁農曆新年期間,與兩名女友人到布吉旅行,享受陽光與海灘,並以三點式上陣大騷弗爆身材。Joile此行帶了四套泳衣,實行日日新款。不過,當中一套粉紅拼色泳衣就跟不少藝人撞款。

做瑜伽練腹肌

雖然Jolie沒有超級上圍,但勝在身材均勻,但她卻嫌自己未夠弗,她說:「其實已經唔係我最弗嘅時候,因為之前又聖誕又新年,不停狂食。去布吉之前我都有狂做運動,但都未係最弗,但個沙灘太靚,所以我都唔吝嗇騷三點式。加上個沙灘好少人,有啲歐洲女仔直情裸上半身,所以我着三點式都唔算好性感!」談到keep fit之道,她稱以前盲目節食減肥,結果太瘦,現時就追求健康及肌肉,所以她會選擇跑步、做瑜伽及鍛煉腹肌代替節食。

即興直播Jam歌

Jolie指今次旅行十分隨意,主要在當地曬太陽及游水,還與友人即興Jam歌:「我哋去咗三個沙灘,有個比較少人,水清沙幼。最好玩係同行嘅朋友係一位音樂人,佢帶咗個樂器Ukulele,大家喺沙灘上唱歌,仲做埋Facebook直播,吸引咗好多人圍觀,都幾好玩有趣。」至於工作方面,Jolie表示剛完成第一首歌的MV,花了三日拍攝,投資了不少時間及金錢,年中則會推出細碟並會參與電影演出,工作排得滿滿。

文:名人組