《區區有女神》：鄧月平餵食豆腐 $32.5做索爆洗頭妹

近期人氣爆燈的19歲「巨胸翠如」鄧月平（Larine），今次在東網巨星節目《區區有女神》中帶隊往深水埗「掃場」，在該區長大的她單單使出「嗲功」已令男女老嫩暈晒大浪，一招「餵阿叔食豆腐」相當耍家，繼而再以最低工資做「最索洗頭妹」，有幸幫襯的哥哥仔非常Enjoy：「好舒服呀！」大嗌要Encore。

深水埗地膽鄧月平捐窿捐罅搵食零難度。

鄧月平憑天使面孔、魔鬼身材最近不停吸Like又吸金，連鄭丹瑞亦開口讚前途無限，既然講得深水埗是Larine主場，當然有圖有片有真相，中學於該區讀書的Larine自誇「留低唔少腳毛」，對深水埗一帶瞭如指掌，年紀小小的她聲稱要「乞食」，期間游走大小舖頭又玩又食，行到糕點店用「嗲聲」問老闆：「可唔可以請我食呀？」食完缽仔糕，再走到豆腐店，擺明「冇錢」要老闆請食豆腐，最後Larine落手煎豆腐，搞到一眾老闆被電到暈晒大浪，讓女神任食任飲，其實以她天賦條件，就算是同性動物玩具店阿姐，亦劈價一半賣給她。

洗得舒唔舒服呀？

Larine眼見全程黐飲黐食唔係辦法，決定卸下女神光環，走到髮型屋見工做「洗頭妹」，老闆一眼認出她，但都冇面畀只出最低工資$32.5時薪，甫開工她就成功拉客，事關位「哥哥仔」同樣認出她是「巨胸翠如」，竟樂做「白老鼠」讓Larine「處女洗頭」，她更自爆：「平時我幫我隻狗沖涼沖得多嘞！今次第一次同人洗頭。」難得哥哥仔好享受，當Larine問他：「洗得舒唔舒服呀？」哥哥仔即有反應冧晒說：「好舒服！」即使洗頭水彈到眼都冇投訴，躺在洗頭椅上都不忘要求集郵，最抵死是Larine看到哥哥仔手機疑是女友的留言，笑問：「先生，你好多Message喎，你嚟洗頭你女朋友知唔知o架？」