菊梓喬獲力捧 脫貧歎世界

現年30歲的歌手菊梓喬（Hana）早前自爆兒時要和胞妹共食一包即食麵「吊命」，加入樂壇後零收入亦要妹妹支持，每日只得廿蚊伙食費。不過她加盟星夢唱片公司不夠一個月，即被公司視為待產中的吳若希（Jinny）接班人，更被欽點唱一星期播足五晚的無綫外購劇《錦繡未央》主題曲《一輩子守候》，擺明行師姐唱「洗腦歌」之路。近日Hana突然富貴，去完日本8日，再到泰國入住五星級酒店又玩又食，心情極好的她穿三點式泳衣在酒店泳池享受日光浴，人生可謂大逆轉。
菊梓喬於泰國酒店泳池大解放，穿三點式曬日光浴。
菊梓喬於泰國酒店泳池大解放，穿三點式曬日光浴。

東京太貴唔敢去

昨日Hana接受電話訪問時仍呻窮，指兩個trip都是免費：「入行後年幾冇放過假，所以同阿妹去日本8日玩吓。都係阿妹墊支住先，兩個人使咗兩萬蚊度，去咗京都、大阪同秋葉原睇電玩，東京太貴唔敢去，我哋都係食火車飯盒，食啲平嘢。」至於泰國之旅則是經理人老闆請她去：「係獎勵我之前喺頒獎禮度攞咗獎。」單身的她最開心有艷遇，有兩名韓國型男主動幫她影相及相約夜蒲，問可有下文？她說：「因為我要返香港，所以失約。」

星夢唱片公司高層何哲圖接受電話訪問時大讚Hana：「因Hana有經歷，令佢好有鬥心，佢嗰團火幫到佢上位，（取代Jinny？）佢係可造之材。（有冇做一姐潛質？）指日可待啦。」而Hana唱的「洗腦歌」《一輩子守候》，在其唱片公司的YouTube上架一周就有十多萬點擊，她感恩說：「啲人都話首歌聽一次就會記得囉。」

  • 放大圖片
去得泰國，當然要盡情品嘗當地美食。
  • 去得泰國，當然要盡情品嘗當地美食。
菊梓喬於日本喪打機。
  • 菊梓喬於日本喪打機。